chhattisgarh : सीएम ह करीन घोसना, देवारी तिहार म मिलही किसान मन ल राजीव गांधी किसान न्याय योजना के तीसरइया किस्त

जय जोहार । (chhattisgarh ) मुख्यमंत्री भूपेश बघेल ह आज रायगढ़ जिला के खरसिया विधानसभा के ग्राम चपले म भेंट मुलाकात कार्यक्रम म आम जनता ले रू-ब-रू होइन। ए दउरान वोहा राज्य सासन के योजना के क्रियान्वयन के स्थिति के जानकारी लीन । वो हा अपन सम्बोधन म देवारी तिहार म किसान मन ल राजीव गांधी किसान न्याय योजना के तीसरइया किस्त दे के घोसना करीन ।

(chhattisgarh ) मुख्यमंत्री ह जमीन की गुणवत्ता अउ उर्वरता ल बनाए रखे बर किसान मन ले वर्मी कम्पोस्ट के उपयोग करे के आग्रह करीन । वो हा किहीन कि राज्य के गौठान म वर्मी कम्पोस्ट बनत हे । एखर जादा ले जादा उपयोग करे जाना चाही । एखर पहले मुख्यमंत्री ह छत्तीसगढ़ महतारी के पूजा अर्चना कर भेंट-मुलाकात कार्यक्रम के सुरुवात करीन ।

चपले के भेंट मुलाकात कार्यक्रम म (chhattisgarh ) मुख्यमंत्री श्री बघेल ह क्षेत्र के विकास बर कई ठीन बड़का घोसना करीन । वो हा चपले म स्वामी आत्मानंद अंग्रेजी माध्यम स्कूल ल प्रारंभ करे, काली माता मेला के हरेक बछर आयोजन बर 10 लाख रुपिया के स्वीकृति, पुलिस सहायता केंद्र चपले के पुलिस चौकी म उन्नयन, कोतरा म पुलिस सहायता केंद्र के स्थापना, चपले म नवीन सामुदायिक भवन अउ पीडीएस भवन के निर्माण, सामुदायिक स्वास्थ्य केंद्र खरसिया म सोनोग्राफी अउ सीटी स्कैन जांच के सुविधा के स्वीकृति के घोसना करीन ।