बेरोजगारी भत्ता देवत हे युवा मन के सपना ल पंख, बनत हे मददगार.. उही पईसा ले बिसात हे पुस्तक-कॉपी
रायपुर. रोजगार के अगोरा करईया युवा मन बर मुख्यमंत्री भूपेश बघेल के पहल ले शुरू करे गे बेरोजगारी भत्ता योजना ह सुघ्घर सहारा बनत हे। राज म अईसे युवा जेखर आर्थिक दसा बने नई होए ले प्रतियोगी परीक्षा के तियारी करे बर दिगर खरचा उठाए म बड़ परेसानी होत रिहिस। अब ए उदिम ले मिले पईसा म ओखर मन के दूसर जरूरत पूरा होवत हे। ए योजना ह कई युवा मन के भविष्य ल नवा आयाम दे म सहायक बने हे।
मनेंद्रगढ़ विकासखंड के ग्राम पंचायत चैनपुर म रवईया मीनू चौरसिया घलो एक बेरोजगार युवा हरे जेन ह प्रतियोगी परीक्षा के तियारी करत हे। ओमन बताईन कि ओखर पिताजी होटल व्यवसाय म हे अऊ ओखर परिवार के आर्थिक दसा बने नई हे। पहिली कापी किताब अऊ स्टेशनरी के संगे-संग परीक्षा म संघरे बर जरूरत के पईसा बर बड़ दिक्कत होत रिहिस फेर अब बेरोजगारी भत्ता मिले ले ओमन ल पुस्तक, कॉपी, पेन, प्रतियोगी किताव अऊ परीक्षा फॉर्म भरे म बड़ मदद मिल गे। यूट्यूब ले पढ़ई करे बर नेट घलो इही पईसा ले रिचार्ज हो गे। ओमन ल अब आर्थिक रूप ले परिजन मन उपर आश्रित रहे के जरूरत नई पड़त हे। मीनू ह बताईन कि अभी ओ ह श्रम विभाग म नियुक्ति बर आवेदन करे हे। योजना ले सहायता राशि पाए बर ओमन ह मुख्यमंत्री भूपेश बघेल ल धन्यवाद करिन।
अईसने कोरबा शहरी क्षेत्र स्थित काशीनगर म रहवईया राजलक्ष्मी राठौर ह कहिन कि ओ ह एमएससी बायोटेक्नोलॉजी के पढ़ई करे के बाद सरकारी नौकारी बर प्रतियोगी परीक्षा के तियारी करत हे। अभी ओ ह यूजीसी नेट, शिक्षक भर्ती परीक्षा के संगे-संग दूसर प्रतियोगी परीक्षा के तियारी करत हे। ओखर सपना हे कि बने नौकरी पा के अपन परिवार के आर्थिक दसा ल मजबूत बनाए म अपन पिता के सहयोग करे। संगे-संग अपन माता-पिता के नांव ल रोसन करे। फेर परिवार के आर्थिक दसा ठीक नई होए ले ओखर इरादा कभू कभू डगमगा जाए। राजलक्ष्मी ह बताईन कि ओखर परिवार म 4 सदस्य हे। ओखर पिता एक स्टाम्प वेंडर हे जेखर आय अतेक नई हे कि परिवार के जम्मो जरूरत ल पूरा कर सके। संग म घर म ओखर पिताजी ह अकेल्ला कमईया हरे। एखर सती ए आय ले घर के दैनिक जरूरत पूरा करे बर बड़ दिक्कत होवत रिहिस।
बता देन कि मुख्यमंत्री भूपेश बघेल ह 31 मई के दिन अपन निवास कार्यालय म आयोजित कार्यक्रम म बेरोजगारी भत्ता योजना के एक लाख 5 हजार 395 हितग्राहियों के खाता म 32 करोड़ 35 लाख 25 हजार रूपए के राशि के ऑनलाईन अंतरण करे रिहिन। ए हितग्राही मन म 66 हजार 185 हितग्राही ल जेन ल अप्रैल महीना म पहिली किस्त जारी करे करे गे रिहिस। ओमन ल आज दूसर किस्त के रूप म 16 करोड़ 54 लाख 62 हजार 500 रूपए, 24 हजार 15 हितग्राही मन ले दे गे हे। जेन मन 30 अप्रैल 2023 तक आवेदन करे रहिन। ओमन माह अप्रैल अऊ मई दूनों महीना के बेरोजगारी भत्ता ल किस्त के रूप म 12 करोड़ 75 हजार रूपए के राशि जारी करे गे हे। अईसने 15 हजार 195 हितग्राही मन ल जेन मन मई 2023 म आवेदन करे रिहिन ओमन ल आज पहिली किस्त के राशि के रूप म 3 करोड़ 79 लाख 87 हजार 500 रूपए के राशि जारी करे गे हे। बेरोजगारी भत्ता योजना के हितग्राही मन ल पहिली अऊ दूसर किस्त के रूप म कुल 48 करोड़ 89 लाख 87 हजार 500 रूपए की राशि जारी करे गे हे।
