जल्दी मिलही शिक्षाकर्मी मन ल तोहफा…..मुख्यमंत्री दिस संकेत

रायपुर। मध्यप्रदेश म शिक्षाकर्मी मन के संविलियन के बाद छत्तीसगढ़ के शिक्षाकर्मी मन ल घलोक 4 जून के बाद कभु घलोक बड़ा तोहफा मिल सकत हे। येकर संकेत शुक्रवार के मुख्यमंत्री डा. रमन सिंह ह मुंगेली जिला म एक प्रेसवार्ता के दउरान दिस हे। उमन कहिन कि 5 जून तक हाईपॉवर कमेटी के रिपोर्ट आ जाही, जेकर आधार म फइसला ले जाही मुख्यमंत्री डा. रमन सिंह विकास यात्रा के पहिली चरण के दउर म आज बिहनिया मुंगेली म पत्रकार मन ले बातचीत करिन हे । उमन ह शिक्षाकर्मी मन के मांग मन म आज फेर एक बयान देवत हुए उेंखर मन बर एक सुभ संकेत दिय हे कि उंकर मांग मन म जल्द फइसला ले जाही। डॉ. रमन सिंह ह कहिन कि 5 जून के हाईपॉवर कमेटी के रिपोर्ट आय के बाद संविलियन म निर्णय ले लिये जाही।
डा. सिंह ह एक दिन पहिली ही ट्वीट कर के ये घलोक कहे रिहिन हे कि मैंय सबों शिक्षाकर्मी भाई-बहिनी मन ल कहिना चाहता हव कि आप मन के भविष्य ल ध्यान म रखके हमन एक हाईपॉवर कमेटी के गठन करे हन , जेकर अध्यक्षता चीफ सेक्रेटरी करत हे अउ आप मन धैर्य रखव, आपके प्रतीक्षा के परिणाम आपके हित म होही। ये ट्वीट के बाद आज मुख्यमंत्री के दुबारा आय बयान ले ये साफ झलकत हे कि मध्यप्रदेश के तरह छग के शिक्षाकर्मी मन के संविलियन के मांग ल सरकार मान के चुनाव के पहिली उमन ल बड़े तोहफा दे सकत हे।