रायपुर। मौसम विभाग ह अवईया 48 घंटा म प्रदेस के कई ठन जिला म भारी बरसा के चेतावनी दे हे। राजध्रानी रायपुर समेत 10 जिला बर रेड अलर्ट जारी करे हे। बुधवार ले प्रदेस के मैदानी इलाका म रूक-रूक के मूसलाधार बारिश होवत हे। बस्तर इलाका म पाछू के 15 दिन ले भारी पानी गिरत हे। नदिया-नरवा मन उफान में हे, जेखर सती उहां के कई गांव के संपर्क ह जिला मुख्यालय ले टूट गे हे।
मौसम विभाग ह अवईया 24 घंटा म रायपुर, धमतरी, बलौदाबाजार, महासमुंद, गरियाबंद, बस्तर के नारायणपुर, बस्तर, बीजापुर, दंतेवाड़ा, सुकमा जिला म मूसलाधार बरसा होय के संभावना जतात रेड अलर्ट जारी करिन हे। उंहे कवर्धा, बेमेतरा, बिलासपुर, जांजगीर राजनांदगांव, बालोद, कांकरे म भारी बरसा होही कहिके बतात हे। बस्तर संभाग के अलावा राजनांदगांव, दुर्ग अउ बालोद जिला म घलो भारी पानी गिरही अईसे चेतावनी अगले 48 घंटे बर जारी करे हे।
