Raipur : कांकेर जिला म होवत हे गुलाब के हाईटेक खेती
जय जोहार। (Raipur ) छत्तीसगढ़ के कांकेर जिला म गुलाब के हाईटेक खेती होवत हे । किसान ह नीदरलैंड के डच वैरायटी के गुलाब के उत्पादन ल करत हे । अइसे ही एक कृषक गिरजा निषाद हे , जेमन ह अपन पुश्तैनी खेती म बदलाव लाके गुलाब के खेती सुरुवात करीन। अब सालाना लाखो रुपिया के कमाई करत हे । ओखर खेत के डच गुलाब के खुशबू अउ रंगत अब रायपुर ही नई बल्कि अन्य सहर म बिखरत हे।
राजधानी रायपुर के संग राज्य के अन्य बड़का सहर म सजावट बर गुलाब सहित अन्य फूल के बड़का मांग हे। एला देखत हुए राज्य सरकार डहार ले किसान ल फूल के खेती ल प्रोत्साहित करे जावत हे । राष्ट्रीय बागवानी मिसन म फूल के उन्नत खेती बर पॉलीहाउस निर्माण सहित अन्य आदान के आलावा उद्यान विभाग डहार ले तकनीकी मार्गदर्शन घलो उपलब्ध कराए जात हे । किसान ल पॉलीहाउस निर्माण बर बैंक के माध्यम ले ऋण अनुदान के घलो व्यवस्था करे जात हे ।
कांकेर जिला के ग्राम चौगेल के गिरजा निषाद ह अपन एक एकड़ म फूल के खेती ले प्रतिदिन 9 ले 10 हजार रुपिया के आमदनी होवत हे । वोहा अपन खेत म बनाए गे पॉलीहाउस म नीदरलैंड के डच वैरायटी के गुलाब के पौधा लगाए हे । सिरिफ एक एकड़ खेत म ही प्रतिदिन 45 ले 50 किलो गुलाब के फूल के उत्पादन ओमन ल मिलत हे । जेला 2 सौ रुपए प्रति किलोग्राम के दर ले रायपुर म पैकेजिंग कर बिक्री बर भेजे जात हे ।
