स्थगित होवत हे बार बार मुख्यमंत्री के जन चौपाल , बैरंग जावत हे फरियादी

जय जोहार रायपुर…. सप्ताह के बुधवार ल निश्चित करे गे हे मुख्यमंत्री के जन चौपाल बर, एमा पूरा राज्य के फरियादी मन अपन मुखिया ले मिले अऊ अपन छोटे मोटे समस्या ले अवगत कराय बर राजधानी पहुंचथे , लेकीन ओमन ल आय के बाद पता चलथे कि आज जन चौपाल स्थगित हे ,निराशा अऊ मायूशी ले के ओमन ल लहुटना पडथे, आज एक फरियादी कवर्धा ले १५० किलोमीटर के सफ़र तय करके अपन विधवा माँ ल धर के मुख्यमंत्री निवास आय रिहिस लेकिन ओला पता चालीस कि आज तो जन चौपाल नई लगत हे ,

अब बात ये फरियादी के , एखर पिताजी ल दू साल पहिली नक्सली मन मुखबिरी के शक म गोली मार के ह्त्या कर दे रिहिस, सर ले बाप के छाया उठे के बाद ओमन ल गाँव म रहे म घलो पाबंदी लगा दे गिस, पीड़ित हेम प्रकाश शर्मा आज मुख्यमंत्री निवास के सामने रो रो के अपन पीड़ा बतात रिहिस, ओला सरकार या तो घर दे दे या छोटे मोटे रोजगार बर मदद कर दे इही मांग हे एखर, पिताजी के मरे के दू साल बाद भी ओला सरकार ले आज तक मदद नई मिलिस,

बता दन कि मुख्यमंत्री के व्यस्तता के कारण जन चौपाल स्थगित होथे लेकिन दूर दराज ले आय फरियादी मन बर सरकार ल कुछ वैकल्पिक व्यवस्था करना चाहि.