जशपुर ।प्रदेस भर म सरकार विकास के कइ दावा करत हे। फेर जशपुर म कोरवा जनजाति के 20 परिवार ल पिए बर साफ पानी तक नइ मिल सकत हे। पहाड़ी कोरवा अऊ नगेशिया आदिवासी मन के ये बस्ती म बोरिंग तो दूर कुँवा तक सरकार ह उपलब्ध नइ कराइस हे। इहां के 20 परिवार ह रोज गड्ढा ले निकले पानी पिथे अऊ अपन प्यास बुताथे। पंचायत के सरपंच ले लेके सरकार तक एकर बर गुहार लगाए गिस। फेर कउनो समाधान नइ निकलिस हे। मामला ह जस के तस बने हे। जब ये मामला म जन प्रतिनिधि मन ले गोठ-बात करे के प्रयास करे गिस त ओमन घलो ये मसला म बात करना जरूरी नइ समझिन।
