लाखों के धोखाधड़ी, दू साल ले फरार आरोपी ल पुलिस ह करिन गिरफ्तार

दुर्ग। जिला म कई फर्म अउ लोगन मन ले लाखों रूपिया के धोखाधड़ी कर फरार आरोपी ल पकड़े म पुलिस ल सफलता मिलिस हे।

जानकारी के मुताबिक आरोपी केतन बोकारिया ल पुलिस ह उत्तरप्रदेश के बनारस ले गिरफ्तार करिन हे। आरोपी केतन के खिलाफ दू साल पहिली दुर्ग निवासी नितिन वैद्य ह शक्कर दिलाए के नाम म 16 लाख रूपिया के धोखाधड़ी करे के  रिपोर्ट दर्ज कराए रिहिस।

मामला दर्ज होय के बाद आरोपी के तलाश म पुलिस जुटे रिहिन। उंहे पुलिस ल मुखबिर ल सूचना मिलिस कि आरोपी ह बनारस म हे, तेकर बाद पुलिस ह टीम के गठन कर आरोपी ल पकड़े बर बनारस रवाना करिस।

पुलिस ह बनारस म दबिश देके आरोपी ल गिरफ्तार करिन हे। एएसपी ह बतईन कि आरोपी के खिलाफ धोखाधड़ी मामला म आईपीसी के धारा 420 समेत कई ठन धारा के तहत कार्रवाई शुरू कर दे गे हे।