28 बीईओ ऊपर गिरीस गाज, ट्रेनिंग प्रोग्राम ले रिहिन नदारद, 7 दिन के भीतर दिही जवाब नई ते होही कार्रवाई

रायपुर। राज्य सरकार के आदेश ल गंभीरता ले नई  लेवईया 28 झन बीईओ ल महंगा पड़ गे। दरअसल शिक्षा विभाग के निर्देश म प्रदेशभर के विकासखंड शिक्षा अधिकारी मन के आधारभूत ट्रेनिंग रायपुर म रखे रिहिन। फेर, ये जम्मो बीईओ मन ट्रेनिंग प्रोग्राम ले बिना सूचना के गायब रिहिस, जेकर कारण प्रोग्राम ल रद्द करना पड़ गिस। एकरे सती डीपीआई ह ढ़ाई दर्जन बीईओ मन ल शो-कॉज नोटिस जारी कर कड़ा कार्रवाई करे के चेतावनी जारी करिन हे।

जानकारी के मुताबिक 14 ले 26 अक्टूबर तक छत्तीसगढ़ प्रशासनिक अकादमी निमोरा म ट्रेनिंग प्रोगाम के आयोजन करे गे रिहिस। जेमा मास्टर ट्रेनर अउ गेस्ट ल घलो आमंत्रित करे के संगे-संग तियारी पूरा कर ले गे रिहिस, फेर 28 अधिकारी मन कार्यक्रम ले नदारद रिहिन।

ये अधिकारी मन न तो विभाग ल अनुपस्थित होय के  सूचना दिन अउ न ही कार्यक्रम म सामिल नई होय कारन बतईस। कम उपस्थिति के वजह से ट्रेनिंग प्रोग्राम ल रद्द करना पड़िस। जेकर बाद डीपीआई ह कड़ा पत्र जारी कर जम्मो अधिकारी मन  ल कड़ी फटकार लगईन हे।

संगे-संग ऐला घोर अनुसासनहीनता बतात  7 दिन के भीतर जवाब तलब करिन हे। डीपीआई ह वो जिला मन के डीईओ ल घलोक चेताया हे, जिहां के बीईओ ट्रेनिंग प्रोग्राम ल नदारद रिहिन।