माता-पिता के पारखी नजर ह काबर संवार दिस लता राही के जिनगी.. अब जोहत हे बड़े काम के रद्दा

जय जोहार@दीपक बावनकर. लता राही.. एक अईसे नाम जेला छॉलीवुड के फिलिम म आपो मन सहायक अभिनेत्री के तौर म देखे होहु। फेर ऐ अभिनेत्री के जीवन के कहानी म ओखर माता-पिता के पारखी नजर के बड़ योगदान हे। काबर कि कला म रूचि ल देखत ओखर माता पिता मन ओला इही छेत्र म जाए के बात ल कहिन अऊ ओखरे मन के सपना ल जीयत लता ह आज ऐ मुकाम म आ गे हे।

शुरू म छोटे-छोटे रोल करईया लता ल के सफर अब सहायक अभिनेत्री के ठउहा म आ गे हे। अब लता ल बड़े रोल के तलाश हे जेखर ले ओ ह छॉलीवुड म अपना नाम कर सके। लता राही जनम शिवरीनारायण के खरौद गांव म होहे अऊ उहें ओखर पालन-पोषण घलो हो हे। माता-पिता के सपना ल पूरा करे बर ओहा छत्तीसगढ़ी फिलिम इंड्रस्ट्री म कदम रखिस अऊ कला के सफर सुरू हो गे।

रायपुर में ओखर मुलाकात होइस आशीष सेन्द्रे ले, जेन ह ओला छोटे-मोटे रोल दिस अऊ अब धीरे-धीरे लता ह चार-पांच फिलिम म सहायक अभिनेत्री के रोल कर चुके हे। शार्ट फिल्म मन म घलोक लता ह अभिनय के लोहा ल मनवा चुके हे। छत्तीसगढ़ी बोली म बने पकड़ होए के कारण लता के डायलॉग डिलीवरी घलो बने हे जेखर कारण फिलिम म ओला सहायक अभिनेत्री के रोल मिलथे। लता के सपना हे कि कला के क्षेत्र में कुछ बने करके अपन मां बाबूजी के नाम रोशन करय।