छॉलीवुड म घलोक आउटसोर्सिंग के बोल बाला, फेर निर्देशक सतीश जैन ह करथे एखर ले परहेज

दीपक बावनकर@रायपुर. छॉलीवुड म घलोक आउटसोर्सिंग के बोल बाला हावे, मतलब छॉलीवुड म बाहरी अभिनेत्री मन ला स्थापित करे के कोशिश ईहां के निर्माता मन करत हे। आप मन ला बता दन एखर शुरुआत होए रिहिस प्रेम चंद्राकर के फिल्म ले ओखर बाद से जतना फिलिम बनीस लगभग सब म उडीसा, मुंबई अउ कोलकाता के हीरोइन मन ला छत्तीसगढ़ी फिलिम म मौका देगीस। बता दन अभी तक आउटसोर्सिंग के जरिए आए अभिनेत्री मन ईहां कुछ कमाल नहीं कर पाईस लेकिन ईहां के अभिनेत्री मन ला एखर से नुकसान जरूर होवत हे।

अभी तक छॉलीवुड म बाहरी हीरोइन मन म प्रिया परमार, लवली अहमद, प्रतिभा पांडे, तनुश्री, अनोखी दत्ता अउ एस्ला घोष मुख्य हे। बाहिर के ए हीरोइन मन ला छत्तीसगढ़ी बोली बोले अउ समझे म घलोक दिक्कत होथे। ये सब ले परे सुपरहिट निर्देशक सतीश जैन ह बाहरी हीरोइन मन ले परहेज करथे, जबकि वो ह भोजपुरी इंडस्ट्री माँ चार पांच फिलिम बना चुके हे । जेमा शिखा चितांबरे ल लेके सुपरहिट फिल्म दे हे। अउ अब अनीकृति चौहान ल ले के 14 जून के फेर आवत हे। जानकारी के मुताबिक बाहिर के हीरोइन मन ज्यादा फीस लेथे अउ इंहा उंखर रेहे खाए म घलोक अब्बड़ खर्चा होथे। तेखर बाद भी कई झन निर्माता-निर्देशक मन हीरोइन चयन म मुंबई, कोलकाता कोति देखथे।