महाशिवरात्रि म शिव मंदिर मन म भोलेनाथ के दर्शन बर भक्त मन के लगिस लंबी कतार

जय जोहार रायपुर…. राजधानी के शिव मंदिर मन म आज महाशिवरात्रि के मऊका म  भोलेनाथ के दर्शन करे बर बड़े संख्या म भक्त मन पहुंचत हे। ये मऊका म हरेक शिव मंदिर ल सजाए गे हे। अऊ भोलेनाथ के विशेष श्रृंगार करे गे हे। ये दौरान मंदिर मन म भक्त मन ह भस्मारती करे गिस।

शहर के महादेव घाट म हटकेश्वर महादेव, बूढ़ेश्वर महादेव, नील कंठेश्वर मंदिर समेत अन्य शिव मंदिर मन म सुबह ले ही भक्त मन भोलेनाथ के दर्शन करे बर लंबी लाइन म लगे रहिस। ये मंदिर मन म भक्त मन ह भोलेनाथ के जलाभिषेक अऊ दुग्धाभिषेक करिस। संगे-संग पूजा-अर्चना करके प्रसाद घलो ग्रहण करिस। खारून नदी तट म एतिहासिक हटकेश्वर नाथ मंदिर भक्त मन के आकर्षण के केंद्र रहिस। इहां महाशिवरात्रि के अवसर म मेला म आसपास के गांव मन के लोग मन बड़े संख्या म पहुंचिस अऊ मेला के लुत्फ उठाइस। संगेसंग श्रद्धालु मन ह खारून नदी म डुबकी लगइस।