मदन चौहान “काकू” ल मिलिस पद्मश्री , मुख्यमंत्री ह दिस बधाई , कला जगत म हर्ष

जय जोहार रायपुर…. भारत सरकार ह छत्तीसगढ़ के जाने-माने गायक मदन चौहान ल पद्मश्री ले सम्मानित करे के घोषणा करे हे , मुख्यमंत्री भूपेश बघेल ह छत्तीसगढ़ के संगीतज्ञ मदन सिंह चौहान ‘गुरूजी‘ ल कला के क्षेत्र म पद्मश्री सम्मान के घोषणा होए ले बधाई अऊ शुभकामना दे हे , मुख्यमंत्री ह किहिस कि छत्तीसगढ़ के प्रसिद्ध संगीत शिक्षक, गजल गायक अऊ सूफी गायक हे, कला जगत ले जुड़े बहुत लोग चौहान जी ल सम्मान म काकू घलो कहिथे,

ओमन अपन पूरा जीवन संगीत साधना बर समर्पित कर दिस, ऊंखर ये उपलब्धि पूरा छत्तीसगढ़ ल गौरवान्वित करे वाला हे , उल्लेखनीय हे कि आज केन्द्रीय गृह मंत्रालय द्वारा पद्म पुरस्कार के घोषणा करे गे हे , जेमा छत्तीसगढ़ ले मदन चौहान के नाम शामिल हे, मदन चौहान 2019 म प्रदर्शित डायरेक्टर मनोज वर्मा के छत्तीसगढ़ी फिलिम ‘महूं कुंवारा तहूं कुंवारी’ म देवी जस गीत गात दिखे रिहिस.