Raipur : नगरी दुबराज ल मिलीन जीआई टैग, मुख्यमंत्री अउ कृषि मंत्री ह दीन बधाई अउ सुभकामना

जय जोहार। (Raipur) छत्तीसगढ़ म सुगंधित चावल के विसेस किस्म ‘नगरी दुबराज‘ ल जीआई टैग मिल गेहे, एखर ले ए किस्म ल राष्ट्रीय अउ अंतर्राष्ट्रीय स्तर म नवा पहचान मिलही । मुख्यमंत्री भूपेश बघेल अउ कृषि मंत्री रविन्द्र चौबे ह ए बड़का उपलब्धि बर प्रदेस के किसान, नगरी के ‘‘माँ दुर्गा स्वयं सहायता समूह’’ अउ इंदिरा गांधी कृषि विश्वविद्यालय के कृषि वैज्ञानिक ल बधाई अउ सुभकामना दीन हे।

इंदिरा गांधी कृषि विश्वविद्यालय अउ छत्तीसगढ़ सासन के पहल रंग लाए हे । भारत सरकार के बौद्धिक संपदा अधिकार प्राधिकरण डहार ले नगरी दुबराज उत्पादक महिला स्व-सहायता समूह ‘मां दुर्गा स्वयं सहायता समूह‘ ल नगरी के दुबराज बर जीआई टैग दे गेहे। गौरतलब हे कि एखर बर पिछले कुछु बछर ले सरलग परयास करे जावत रिहीन । नगरी के दुबराज चावल ल जीआई टैग मिले ले एखर मांग देस के संगेसंग विदेस म घलो बढ़ जाही । एखर ले धमतरी जिला के नगरी अंचल के किसान ल आर्थिक लाभ मिलही ।

जियोग्राफिकल इंडिकेशंस टैग ह एक प्रकार के बौद्धिक संपदा अधिकार होत हे जेमा कोनो घलो उत्पाद के गुणवत्ता अउ महत्ता ल वो स्थान बिसेस के भौगोलिक वातावरण ले निर्धारित करे जात हे । एमा उस उत्पाद के उत्पत्ति स्थान ल मान्यता प्रदान करे जात हे ।