भूपेश सरकार के फैसला, अब गरीब परिवार मन ल एक संग दे जाही दु महीना के राशन

जय जोहार रायपुर…. कोरोना के चलत गरीब मन ल खाना के किल्लत न होय, ओला सुनिश्चित करे बर राज्य सरकार ह एक अहम फैसला करे हे। सरकार ह पीडीएस के तहत दु महीना के राशन ल एडवांस म देही। ए आदेश ल खाद्य नागरिक आपूर्ति अऊ उपभोक्ता संरक्षण विभाग ह जारी करे हे। ए फैसला के फायदा ह बीपीएल परिवार मन ल होही। बीपीएल परिवार ह राशन केंद्र मन ले एक संग दु महीना के राशन ले सकही। जबकि एपीएल परिवार मन ल अवइया एक महीना के एडवांस राशन मिलही। अतिरिक्त चावल रखे बर ऊहां मौजूद शासन भवन मन के इस्तेमाल होही, जेखर जिम्मा जिला के कलेक्टर ल दे गे हे।

कोरोना ल देखत हुए प्रदेश के शहरी क्षेत्र मन म लॉकडाउन के बीच मुख्यमंत्री भूपेश बघेल के निर्देश म ए खाद्य विभाग के अहम फैसला हे। राशन दुकान मन म प्रशासन ह ऐतिहात बरते के निर्देश घलो दे हे। प्रशासन ह केहे हे कि राशन ले बर लगइया लाइन म एक-एक मीटर के दूरिया रखे जाए।