कोरबा। प्रदेशव्यापी लोक सुराज अभियान के बेरा मुख्यमंत्री डा. रमन सिंह कोरबा जिला के ग्राम भैंसामुड़ा (ब्लाक करतला) म आयोजित समाधान शिविर म सामिल होए रहिन। ए बेरा म उमन गांव वाले मन ले प्रधानमंत्री आवास अउ उज्जवला योजना के संबंध म जानकारी लेहे रहिन। शिविर म सरगबुंदिया निवासी रामबाई पति कार्तिक राम साहू ह मुख्यमंत्री के आघू उज्जवला गैस कनेक्शन के लाभ नइ मिले के बात बताए रहिस। मुख्यमंत्री के निर्देश म खाद्य विभाग कोरबा कोति ले जल्दी कार्यवाही करत रामबाई ल गैस कनेक्शन निःशुल्क प्रदान करे गीस। बातचीत के समय रामबाई ह बताइस कि वो अऊ ऊंखर पति रोजी-मजदूरी करथें अउ शुरू ले ही चूल्हा के उपयोग करत आत हे। उमन ये घलोक बताइन कि रसोई गैस के उपयोग वो अपन जीवन म पहली पइत उपयोग करहीं। खुशी ले लबरेज रामबाई ह कहिन कि ‘सुने हंव के एखर से खाना जल्दी तैयार होथे अऊ एखर से धुआं घलोक नइ उठय। अइसन म मैं अऊ मोर पति बचे समय ल काम अऊ आन मजदूरी म लगा सकबोन।‘ रामबाई ह स्वच्छ ईंधन प्रदान करे बर प्रदेश के मुख्यमंत्री ल हृदय ले धन्यवाद दीन। रामबाई ह अब आन महिला मन ल घलोक स्वच्छ ईंधन के सुरक्षित उपयोग करे बर प्रेरित करे के संकल्प लेहे हें।
