छत्तीसगढ़ के सत-प्रतिसत घर हो ही बिजली ले रोसन : सीएम बघेल

रायपुर। छत्तीसगढ़ के 23 जिला  के सबो घर विद्युत के रोशनी ले रोशन हो गेहे। राज्य म चार जिल के 553 गांव मन के 20 हजार 134 घर अइसे हे, जिहां रोसनी उपलब्ध कराय जाना बचे हे। प्रदेश के मुख्यमंत्री भूपेश बघेल अउ केन्द्रीय विद्युत, नवीन एवं नवीकरणीय ऊर्जा राज्य मंत्री आरके सिंह के उपस्थिति म बुधवार के विधानसभा के समिति कक्ष म सौभाग्य योजना के क्रियान्वयन के समीक्षा करे गिस। अउ निर्णय लेय गिस के, छत्तीसगढ़ म अभु तक रोसनी ले वंचित सत-प्रतिसत घर मन ल जल्द ले जल्द रोसन करे जाही।

बइठक म जानकारी दे गिस के,  वर्तमान म बीजापुर, सुकमा, दंतेवाड़ा अउ नारायणपुर जिला के नक्सल समस्या ले प्रभावित क्षेत्र अउ दुर्गम प्राकृतिक-भौगोलिक परिस्थिति मन के कारन 20 हजार 134 घर मन म बिजली नइ पहुंचाए जा सकीस हे। एमा ग्रिड के उपलब्धता वाला 266 गांव के 7 हजार 987 घर अउ आफ ग्रिड के 287 गांव के 12 हजार 147 गांव बते हे।  बइठक म निरनय लेय गिस के, अइसे घर मन जिहां विद्युत लाईन के माध्यम ले बिजली नइ दे जा सकय, उहां क्रेडा के माध्यम ले सौलर होम लाईट सिस्टम ले बिजली पहुंचाए जाही।

बइठक म सौभाग्य सहज बिजली हर घर योजना अउ दीनदयाल उपाध्याय ग्राम ज्योति योजना के समीक्षा के दउरान जानकारी दे गिस के, छत्तीसगढ़ म सौभाग्य योजना 11 अक्टूबर 2017 ले प्रारंभ करे गे हे। राज्य म अभु तक सबो 27 जिला के सत-प्रतिसत गांव मन ल विद्युतीकृत कर देय गे हे। एमा ले 23 जिला के सत-प्रतिसत घर मन म बिजली पहुंच गे हे। राज्य के बचे चार जिला बीजापुर जिला के 89.2 प्रतिसत, दंतेवाड़ा जिला के 99.2 प्रतिसत, सुकमा के 84.16 प्रतिसत अउ नारायणपुर जिला के 93.08 प्रतिसत घर मन म बिजली पहुंच गे हे।