छत्तीसगढ़ म सरकार ह कर सकत हे “वरिष्ठ नागरिक कल्याण आयोग” के गठन

रायपुर।  छत्तीसगढ़ म कांग्रेस सरकार ह अपन संगठन के वरिष्ठ नेता अउ कार्यकर्ता मन के बात ल सुनही त जल्दी ही राज्य म एक नवा आयोग के गठन बर मुहर लग सकत हे।  वो आयोग होही “वरिष्ठ नागरिक कल्याण आयोग”। ऐखर अंतरगत 60 बछर अउ ओखर ले जादा उमर वाले लाखों लोग मन ल फायदा मिलही। संगठन म अभी अइसने चर्चा हे, काबर कि मध्यप्रदेश समेत अब्बड़ अकन राज्य म इही तरह के आयोग क्रियाशील हे, जेमा पेंशन ह वो उमर के लोग मन बर बहुत बड़े सहारा होथे। अइसने सुझाव सरकार के पहुंचे होही त मुख्यमंत्री ह का निरनय लेथे ये तो ओखर मंत्री अऊ नौकरशाह उपर निरभर करत हे।

वर्तमान म सरकार के पास आयोग म बिठाय बर पद बहुत हे अउ बैठइया मन के कतार ह घलो लंबा हे। सरकार ह अपन पार्टी म कई बछर ले सेवा देवइया लोग मन उपर कुछ उपकार करही त ये आयोग के गठन ले ओखर वोट बैंक ह बने रहिही अउ वरिष्ठ नागरिक मन के सम्मान भी होही।