Corona: बलौदाबाजार म फेर मिलिस कोरोना के 6 नवा मरीज, चार मरीज मन ह दिस कोरोना ल मात

जय जोहार…. बलौदाबाजार जिला म बुधवार के कोरोना (corona) के 6 नवा मरीज मिले हे। एखर पुष्टि ल जिला प्रशासन ह करे हे। उहचे चार मरीज मन ह कोरोना ले जंग जीत गे हे, जेखर बाद ओ मन ल जिला कोविड अस्पताल ले डिस्चार्ज कर दे गे हे।

आज जेन कोरोना (corona) के 6 नवा मरीज मिले हे, ओमा ले बलौदाबाजार विकासखण्ड के ग्राम बलौदी ले 5 मरीज हे अउ एक मरीज ह पलारी नगर ले हे।

जिला मुख्य स्वास्थ्य अउ चिकित्सा अधिकारी डॉ. खेमराज सोनवानी ह बताइस कि सबो मरीज मन ल जिला कोविड अस्पताल म लाय बर एंबुलेंस ल रवाना कर दे गे हे।

आज मिले नवा मरीज मन के संग जिला म कोरोना (corona) मरीज मन के संख्या ह बाढ़ के 369 हो गे हे। जेमा ले एक्टिव मामला 56 हे। उहचे 312 मरीज मन ल बने होय के बाद डिस्चार्ज कर दे गे हे।