हमर छत्तीसगढ़ के लईका मन ओडिशा के भुवनेश्वर म 9 ले 12 जून तक आयोजित होवईया पहिली जनजातीय राष्ट्रीय खेल प्रतियोगिता म छत्तीसगढ़ के जस ल बगरावत हे। छत्तीसगढ़ के खिलाड़ी मन ह इहां 1 स्वर्ण, 6 रजत, 8 कांस्य मिलाके 15 पदक अपन नाव करे हे। स्पर्धा म 18 राज्य के खिलाड़ी मन ह अपन-अपन प्रतिभा अऊ खेल कौशल के प्रदर्शन करे हे।
छत्तीसगढ़ के खिलाड़ी मन ह अपन सुघ्घर प्रदर्शन ल करत 50 मीटर तैराकी म रजत अऊ 100 मीटर म कांस्य पदक जीते हे। उहें हमर प्रदेश के फुटबॉल बालिका टीम ह गोल्ड मैडल जीतके अपन लोहा मनवाए हे। ए बड़े जीत के हीरो रायपुर के बालिका फुटबॉल अकादमी म अभ्यासरत खिलाड़ी किरण पिस्दा ह रिहिस। वईसने खो-खो बालिका टीम अऊ कबड्डी बालिका टीम ल घलो कांस्य पदक मिले हे। एथलेटिक्स के ऊंची कूद इवेंट म तानिया ह कांस्य पदक, 5000 मीटर दौड़ पुरुष म मनीष मांडवी ह रजत पदक, 100 मीटर दौड़ म बिलासपुर के बहतराई आवासीय खेल अकादमी के तर्नीका टेटा ह रजत पदक अऊ लंबी कूद म कांस्य पदक अपन नाव करे हे।
5000 मीटर दौड़ बालिका म प्रमिला मांडवी ह रजत पदक हासिल करे हे। तीरंदाजी म बिलासपुर के बहतराई आवासीय खेल अकादमी के कुबेर सिंह जगत ह व्यक्तिगत 30 मीटर म रजत पदक अऊ व्यक्तिगत ओवर ऑल म रजत पदक अपन नांव करे हे। मिक्स इवेंट म कुबेर सिंह अऊ बुंदेश्वरी मरावी ह कांस्य पदक जीते हे। उहें तीरंदाज़ी म टीम चैंपियनशिप बलिका ह कांस्य पदक अऊ बालक तीरंदाजी टीम ह रजत पदक हासिल करे हे।
ए सुघ्घर उपलब्धि ल देखत मुख्यमंत्री भूपेश बघेल अऊ खेल मंत्री उमेश पटेल ह खिलाड़ी मन के सुघ्घर प्रदर्शन बर बधई दे हे उहें खिलाड़ी मन के उज्जर भविष्य के कामना करे हे।
