कवर्धा। कबीरधाम जिला म भारतीय प्रसासनिक सेवा के युवा अधिकारी अवनीश शरण कलेक्टर के रूप म पदस्थ हे, ग्रामीन मन के सिकायत म कलेक्टर ह दू पटवारी मन ल निलंबित कर दिस हे। जेखर खेलाफ पटवारी संघ ह बगावत कर मोरचा खोल देय हे। ब्लाक मुख्यालय के बाद जिला मुख्यालय म घलो दू दिन ले पटवारी संघ हड़ताल म बइठे हे। अउ अपन मांग पूरय होय तक जारी रखे बर म अड़े हुए हे।
जिला के पंडरिया विकासखंड अंतरगत वनांचल गांव बिरहुलडीह कलेक्टर अपन दउरा म पहुंच रहिन। ये बीच म ग्रामीन मन ह दू पटवारी के सिकायत करिन हे जेमा नाराज होके कलेक्टर ह दू पटवारी मन ल तत्काल प्रभाव ले निलंबित कर दिस हे। जेखर खेलाफ पटवारी संघ ह मोरचा खोल दिस हे। उमन के कहिना हे के निलंबित दू अधिकारी अन्य अधिकारी के संग सासकीय कारय म तइनात रहिन हे अउ उमन ल कलेक्टर के दउरा के कोनो सूचना उंखर वरिष्ठ अधिकारी मन नइ दिस हे। निलंबन के पूरव नोटिस के प्रावधान हे लेकिन येकर घलो पालन नइ करे गिस हे। संघ के मानन हे के जब तक दूनों पटवारीमन के निलंबन वापिस नइ होही तब तक हड़ताल जारी रहही।
समझउता बर चलत हे बइठक
पटवारी संघ के अध्यक्ष गेंदलाल मेरावी ह बताइन के पटवारी मन के हड़ताल के प्रभाव हे के जिला कलेक्टोरेट म अधिकारी मन के संग पटवारी संघ के पदाधिकारी मन के बइठक चलत हे जल्द ही हमार मांग मान ले जाही। यदि नइ माने जाही त हमर हड़ताल जारी रहही।
