9 बेरोजगार युवक ल अपन शिकार बनाइस ठग मन… फरजी नियुक्ति पत्र दे के  50 लाख वसूल लिन

रायपुर। छत्तीसगढ़ के राजधानी म नउकरी लगाए के नाम म ठगी के एक मामला  आघू आइस हे।  ठग मन ह मंत्रालय म नउकरी लगाए के झांसा देके लाखों रुपिया ठग लिन। हैरत ए हे के आरोपी मन ह फरजी नियुक्ति पत्र घलो जारी कर दीन। ठग मन ह लगभग 9 बेरोजगार  युवक मन ल अपन शिकार बनाइस हे। फिलहाल पुलिस मामला के जांच करत हवय।

मिले जनाकारी  म रायपुर के मुजगहन थाना क्षेत्र म नउकरी लगाए के नाम म 50 लाख रुपिया ले अधिक के ठगी के मामला उजागर होइस हे। 9 बेरोजगार युवा मन ले मंत्रालय म नउकरी दिलाए के नाम  म ए ठगी करे गिस। आरोपी मन ह बाकायदा बेरोजगार युवा मन ल  5 -5 लाख रुपिया लेके मंत्रालय म ड्राइवर अउ प्यून के ज्वाइनिंग लेटर घलो जारी कर दिन। . लेकिन ज्वाइनिंग करे बर जाए ले युवा मन ल ठगे जाने के एहसास होइस हे। पीड़ित मन ह  एखर सिकायत मुजगहन थाना म करिन हे। एखर बाद पुलिस ह विष्णु गुप्ता के संग ओखर साथी मन के खेलाफ ठगी के मामला दरज करिन हे।