कांकेर। पति के प्रेम प्रसंग ल खतम करे बर एक महिला ह तंत्र मंत्र के सहारा लिस, फेर वो ह खुद तांत्रिक के शिकार बन गे। पूजा पाठ करे के नाम म तांत्रिक ह दुष्कर्म करिस हे।
बतात हे कि कोतवाली थाना के कोड़ेजूंगा गांव म दंतेवाड़ा के रहवइया एक महिला ह अपन पति के दूसर महिला के संग चलत प्रेम प्रसंग ल पूजा-पाठ करके छुड़ाए बर जून महीना म एक झन तांत्रिक के पास पहुंचीस।
तांत्रिक ह तंत्र-मंत्र के आड़ म महिला ले दुष्कर्म करिस। मामला इहे नई रुकिस, तांत्रिक ह ओला ये बात ल कोनो ल मत बताबे कहिके धमकी देके ओखर ले दू लाख रुपिया ले जादा वसूल घलो कर लिस।
पीड़ित महिला ह तांत्रिक के खिलाफ पुलिस म शिकायत करीस, जेखर बाद कोतवाली पुलिस ह केस दर्ज कर आरोपी तांत्रिक पुष्प राज सिन्हा ल गिरफ्तार करिन हे। आरोपी ह पूजा-पाठ करे के बात ल तो मानत हे फेर दुष्कर्म अउ पैसा वसूली के बात ले इनकार करत हे।
