रायगढ़। कुनकुरी के केराडीही स्कूल म शिक्षक ह बुखार ले पीड़ित कक्षा 7 वीं के एक छात्र के बेरहमी ले पिटाई कर दिस। जेखर ले वो लइका के तबियत ह अउ बिगड़ गे, ताहन नाराज परिजन मन स्कूल पहुंच के जमके हंगामा करीस हे। उंहे शिक्षक ह पीड़ित लइका द्वारा पालक ल बुला के लईस हे तेखर बर नाराज हो गे जम्मो छात्र-छात्रा मन ल घर वापस भेज दिस, जेखर ले उंखर पालक मन म घलो नाराजगी देखे बर मिलिस। ये मामला ल कलेक्टर ह गम्भीरता से लेवत मिडिल स्कूल के प्रधानपाठक अउ वो शिक्षक ल निलंबित करिन हे।
बतात हे कि ये मामला ह सरकारी मिडिल स्कूल केराडीह के हरे, जिहां छात्रावास म रहिके पढ़ई करत 7 वीं के छात्र अभिनव तिर्की ह शिक्षक सोनाराजा मंडावी ले बुखार हे कहिके छुट्टी मांगीस। शिक्षक ह छात्र ल झूठ बोलत हस कहिके कार्यालय म जमके पिटाई करीस।
बुखार ले पीड़ित छात्र ह पिटाई के बाद अपन कक्षा म जाके सूत गे। उंहे जब लइका मन ह स्कूल बैग लेके घर गिस अउ पालक मन के मीटिंग म नई आए ले टीसी दे के बात बताईन त परिजन मन भड़क गे अउ स्कूल पहुंच के हंगामा शुरू कर दिस। परिजन मन मारपीट के आरोपी शिक्षक सोनाराजा मंडावी ल हटाए बर अउ जम्मो लइका के टीसी दे के मांग करे लागीस। स्कूल म हंगामा के खबर मिले के बाद कलेक्टर के निर्देश म तहसीलदार अनुराधा पटेल, बीईओ पीके भटनागर, बीआरसी विपिन अम्बष्ट ह स्कूल पहुंच के मामला के जांच कर प्रधानपाठक अउ आरोपी शिक्षक उपर निलंबन के कार्रवाई करे गिन।
