आज ले शुरू होइस तेंदूपत्ता संग्रहण, करीब साढ़े छह सौ करोड़ रूपिया मिलही संग्रहण करइया 13 लाख वनवासी परिवार मन ल
जय जोहार…. वन मंत्री मोहम्मद अकबर ह बताइस कि आज ले बस्तर म तेंदूपत्ता संग्रहण के काम शुरू हो गे हे। दु दिन बाद ए पूरा प्रदेश म शुरू हो जाही। सरकार ह ए साल 649 करोड़ रूपिया के तेंदूपत्ता संग्रहण के लक्ष्य रखे हे। पिछले साल सरकार ह 609 करोड़ रूपिया के तेंदूपत्ता संग्रहण के भुगतान करे रहिस।
वन मंत्री ह बताइस कि सरकार संग्रहण करइया वनवासी मन के प्रति मानक बोरा 4000 रूपिया के भुगतान करत हे। सरकार ह एखर बर टेंडर के प्रक्रिया ल पूरा कर ले हे। जिहां टेंडर नई होय हे, ऊहां सरकार ह खुद खरीदी करही। संबंधित व्यापारी मन ल बार्डर के इलाका ले संबंधित डीएफओ ले मिले के अनुमति दे गे हे।
वो हा बताइस कि तेंदूपत्ता संग्रहण कर्ता मन ल लॉकडाउन के पूरा पालन करना होही। फिलहाल संग्रहण कर्ता मन बर 50 लाख मास्क बनाय जावत हे। विभाग ए मास्क 13 लाख हितग्राही परिवार मन ल देवत हे। मास्क विभाग के तरफ ले महिला मन के स्वसहायता समूह के जरिये बनवाय गे हे। हर हितग्राही परिवार ल तीन ले चार मास्क दे जाही।
