लक्ष्मी राजवाड़े के तुरत-फांत पहल ले सिलफिली मंडी ला मिलिस बड़ राहत
औचक निरिक्छन के बेरा में मिले सिकायत ऊपर तुरत कारबाई, ट्रांसफार्मर सिफ्टिंग अउ सरबजनिक सुचालय सुरु होए ले बाढ़ीस सुबीता’
रायपुर: आम लोगन मन के सुबीता अउ उहां के बियापारी के समसया ला तुरत सुझाय बर महिला एवं बाल बिकास तथा समाज कलयान मंत्री अउ भटगांव के बिधायक लक्ष्मी राजवाड़े ह लगातार अगुवई करत हें। ओकर निरदेस (निर्देश) ऊपर सिलफिली सबजी मंडी में बछर ले लटके ट्रांसफार्मर सिफ्टिंग के समसया के पक्का समाधान कर दिए गिस हे, जेकर से उहां के बियापारी अउ नागरिक ला बड़ राहत मिले हे।
गियान रहे कि 10 मई के दिन मंत्री लक्ष्मी राजवाड़े ह सिलफिली सबजी मंडी के अचकचा निरिक्छन करे रहिन। ए बेरा में उहां के लोगन मन अउ दुकानदार ह ओमन ला ट्रांसफार्मर के गलत जगह में होय, आवइ-जावइ में होवत सुसकती (परेशानी) अउ सरबजनिक सुचालय के बंद रहे के समसया के बारे में बताइन। मंत्री ह ओही जगा में समसया ला संज्ञान में लेवत जुड़े बिभाग ला तुरत कारबाई करे के हुकुम दारीन।
सुगघर अउ सुरक्छित जगा में सिफ्ट होइस ट्रांसफार्मर
सिलफिली सबजी मंडी परिसर में ट्रांसफार्मर ह बड़ दिन ले अइसन जगा में गड़े रिहिस, जहां बियापारी, गाहक अउ रंघिया (राहगीरों) मन ला आवइ-जावइ में तो कतको मुसकिल होवइच, संग में जान-माल के खतरा घलो बने रहय। मंत्री श्रीमती राजवाड़े के निरदेस के बाद बिजली बिभाग के टिम ह तुरत-फांत कारबाई करत ट्रांसफार्मर ला सुरक्छित अउ सुग्घर जगा में हटा (स्थानांतरित) दीस। एकर से मंडी परिसर में अब आना-जाना बड़ सुगम अउ सुरक्छित होगे हे, अउ ब्यापार-बुता करे में घलो सुबीता होवत हे।
सरबजनिक सुचालय घलो होइस सुरु एही ककरम में मंत्री श्रीमती राजवाड़े के कहे ऊपर मंडी इलाका में बने सरबजनिक सुचालय ला घलो सुघराई से सुरु करवा दिए गिस हे। एकर से बियापारी मन, माईलोगन (महिलाओं) अउ आम मनखे मन ला साफ-सुथरा अउ सुबिधाजनक मूलभुत सुबीता मिल सकत हे।
गामीन अउ बियापारी जताइन आभार
उहां के बियापारी अउ आम लोगन मन ए पहल ला जनहित में बड़हन कदम बतात मंत्री लक्ष्मी राजवाड़े के धनबाद (आभार) करिन। ओमन कहिन कि जनसमसया बर ओकर मया-पिरीत अउ तुरत फैसला लेय के सुभाव (कार्यशैली) के सेती इलाका के लोगन मन ला सीधा लाभ मिलत हे।
हमर व्हाट्सएप चैनल ला सब्सक्राइब करव अऊ मया देवव
https://whatsapp.com/channel/0029VaPmGTXInlqS2WQAhw1n
YOUTUBE – https://youtube.com/@jayjohar?si=AZDI5zciOCT3Oqhw
FACEBOOK PAGE – https://www.facebook.com/share/18GsFBTgfd/
