प्रधानमंत्री आवास योजना ले पूरा होइस पक्के घर के सपना

ये ह सिरिफ़ मकान नई आय, परिवार के सपना, लइका मन के सुरक्षित भविष्य अउ सम्मान ले जिये के मजबूत नींव आय

बिलासपुर. धुरीपारा, मंगला के रहइया सुकृता पटेल अउ लक्ष्मीन रजक के पक्के घर के सपना कतको साल ले अधूरा रीहीस। कच्चा मकान मा हर मौसम ओमन बर एक चुनौती बनके आवत रीहीस। बरसात मा चुहत छत, गरमी मा तेज तपन अउ जाड़ मा कतकोन असुविधा के बीच परिवार ह अपन गुजारा करत रीहीस। फेर अब ये दुख के दिन बीते समय के बात हो गे हे। प्रधानमंत्री आवास योजना (शहरी) के तहत ओमन ला पक्का घर मिलीस हे, जेखर ले ओखर जिनगी मा खुशी के नवा सौगात आय हे।

पक्का घर मिले के बाद सुकृता अउ लक्ष्मीन के परिवार के चेहरा मा संतोष अउ खुशी साफ दिखत हे। अब ओमन ला मौसम के मार के डर नई हे। लइका मन ला घलो सुरक्षित अउ बढ़िया माहौल मिलत हे। सुकृता पटेल अउ लक्ष्मीन रजक कहिथे कि कच्चा घर के मुस्किल मन ले लड़त ओमन ला बरसों हो गे रीहीस, फेर प्रधानमंत्री आवास योजना ह गरीब अउ जरूरतमंद परिवार मन के जिनगी ला बदल के रख दीस हे।

पक्का घर मिले ले ओखर परिवार ला सुरक्षा, सम्मान अउ बढ़िया भविष्य के नवा आस मिलीस हे। ओमन कहिथे – “ये घर हमर बर सिरिफ़ एक ठन मकान नई आय, बल्कि परिवार के सपना, लइका मन के सुरक्षित भविष्य अउ सम्मानजनक जिनगी के एक मजबूत नींव आय।”