Raipur : तालाब खुदाई म मिले योग नृसिंह के विरल प्राचीन मूर्ति ल लाय गेहे रईपुर के घासीदास स्मारक संग्रहालय, पढ़व

जय जोहार । रईपुर (Raipur ) जिला के आरंग विकासखण्ड अंतर्गत ग्राम कुम्हारी म तालाब गहरीकरण के दउरान मिले योग नृसिंह के विरल प्राचीन मूर्ति ल सुरक्षित अउ संरक्षित करे बर संस्कृति अउ पुरातत्व विभाग डहार ले रईपुर के घासीदास स्मारक संग्रहालय म लाय गेहे । योग नृसिंह के ये प्राचीन मूर्ति ह लाल बलुआ प्रस्तर ले निर्मित हे अउ 4थी-5वीं सदी ईसवी के आंके जावत हे । तालाब खनन के दउरान गुप्तकालीन पात्र परंपरा के मृदभांड घलो पाय गेहे ।

गौरतलब हे कि 15 फरवरी के सोशल मीडिया म प्रसारित ग्राम कुम्हारी जिला रईपुर (Raipur ) ले खुदाई में दउरान नरसिंह के प्राचीन प्रतिमा मिले के खबर के आधार म संस्कृति अउ पुरातत्व विभाग के संचालक विवेक आचार्य ह विभागीय अधिकारी मन के टीम बनाके प्राप्त प्रतिमा अउ ओखर प्राप्ति स्थल के निरीक्षण करे के निर्देस देहे । उप संचालक डॉ. पी.सी. पारख के नेतृत्व म पुरातत्त्ववेत्ता प्रभात कुमार सिंह, उत्खनन सहायक प्रवीन तिर्की के टीम ह कुम्हारी पहुँचके मूर्ति अउ प्राप्ति स्थल के मुआयना करीन ।

सरपंच तेजराम साहू ह अधिकारी मन ल बताइन कि बस्ती के उत्तर म बघधरा नामक देवस्थल के पास स्थित भाठा जमीन म ग्राम पंचायत डहार ले तालाब निर्माण के उद्देश्य ले मनरेगा के तहत करे जावत खुदाई के दउरान ये मूर्ति प्राप्त होय हे , जिला पंचायत भवन म रखे गेहे । विभागीय टीम ल उक्त स्थल के निरीक्षण के दउरान गुप्तकालीन पात्र परंपरा के मृदभांड घलो देखे ल मिलीन हे।

पुरातत्व विभाग के अधिकारी मन ह बताइन कि ये प्राचीन मूर्ति के पहचान योग नृसिंह के रूप म करे गेहे । ये अनूठी अउ विरले प्राप्त होवइया मूर्ति हे । एला नृसिंह अथवा शांत नृसिंह घलो कहे जात हे । अइसे मुद्रा म देवता अकेला शांत बइठे हुये प्रदर्सित करे जात हे । आमतौर म हिरण्यकश्यप के वध करत हुये नृसिंह मूर्ति बहुतायत म मिलत हे, लेकिन नृसिंह के ए रूप के प्रतिमा के शिल्पांकन अपेक्षाकृत कम होय हे। (Raipur ) लाल बलुआ प्रस्तर निर्मित ए मूर्ति के आकार ह 18ग12.5ग02 सेंटीमीटर हे, जेखर निचला भाग ह अंशतः खण्डित हे । मूर्ति के बनावट, प्रतिमा लक्षण अउ प्राप्ति स्थल ले ज्ञात पात्र-परंपरा के आधार म एखर तिथि लगभग 4थी-5वीं सदी ईसवी आंके जावत हे । स्थानीय ग्रामीण अउ पंच ले चर्चा के बाद तालाब गहरीकरण के दउरान प्राप्त मूर्ति ल सुरक्षित अउ संरक्षित करे बर सरपंच ले प्राप्त कर के रईपुर लाय गेहे ।

नृसिंह देवता के अनूठी शिल्पाकृति ल पुरातत्व विभाग ल सौंपे के कार्यवाही म अनुविभागीय अधिकारी (राजस्व) अतुल विश्वकर्मा, आरंग के थाना प्रभारी एल.डी. दीवान समेत उप सरपंच पोखनलाल, डॉ. नंद कुमार, फुलेश्वर साहू, आशाराम साहू अउ सुरेश साहू के उल्लेखनीय सहयोग रिहीन ।