विशेष पिछड़ा जनजाति के संगे-संग 10 वी अऊ 12वीं के 89 टॉपर नोनी-बाबू करिन हेलीकाप्टर के सैर
रायपुर. मन म लगन हावे अऊ कुछु करे के कोनों सपना देखथे त ओ सपना ह एक दिन जरूर संवरथे। मुख्यमंत्री भूपेश बघले के घोसना ले 10वीं अऊ 12 वीं के टॉपर नोनी-बाबू मन रायपुर के पुलिस ग्राउंड म हेलीकॉप्टर ले ज्यायराइड करिन। उत्साह ले लबरेज ए लईका मन के सफर बड़ रोमांचकारी रिहिस। त सुनथन उही लईका मन के जुबानी…..
बता देन कि छत्तीसगढ़ माध्यमिक शिक्षा मण्डल के बछर 2023 के कक्षा दसवीं अऊ बारहवीं के वार्षिक बोर्ड परीक्षा म प्रावीण्य सूची म जगह बनईया 89 लईखा मन राजधानी के पुलिस परेड ग्राउण्ड ले हेलीकॉप्टर ले जॉयराईड करिस। कक्षा 10वीं म 49 अऊ कक्षा 12वीं म 30 नोनी-बाबू ह प्रावीण्य सूची म स्थान बनाए हे।
अईसने विशेष पिछड़ा जनजाति के अपन-अपन वर्ग म 10 वीं के पांच अऊ 12 वीं के पांच के संगे-संग 10 टॉपर लईका मन ल हेलीकाप्टर के सैर कराए गिस। पाछू के बछर म घलो प्रावीण्य सूची म स्थान पवईया 125 मेधावी विद्यार्थी मन ल मुख्यमंत्री भूपेश बघेल के वादा के अनुरूप हेलीकॉप्टर म जॉय राईडिंग कराए गे रिहिस। स्कूल शिक्षा मंत्री डॉ. प्रेमसाय सिंह टेकाम के अध्यक्षता म ए कार्यक्रम ल करे गिस। ए बेरा म स्कूल शिक्षा सचिव एस भारतीदासन, प्रमुख सचिव शिक्षा आलोक शुक्ला, सचिव माध्यमिक शिक्षा मंडल वी के गोयल, रायपुर जिला शिक्षा अधिकारी आरएल ठाकुर संगे-संग दूसर अधिकारी मन घलो संघरे रिहिन।
लईका मन करिन अपन अनुभव साझा
कोरबा जिला के विशेष पिछड़ा बिरहोर जनजाति के कक्षा 12 वीं के छात्र सुकसम ह बताईन कि मुख्यमंत्री के ए पहल ह बड़ सुघ्घर हे। एखर ले हमर जईसे पिछड़ा समुदाय ले अवईया लईका मन ल प्रावीण्य सूची म आए ले प्रोत्साहन मिले हे।
विजय इंग्लिश मीडियम स्कूल मनेन्द्रगढ़ के कक्षा 12 वीं के नोनी प्रिया रोहरा ह हेलीकॉप्टर ज्यायराइड बर मुख्यमत्री ल धन्यवाद देत कहिन कि छोटे शहर ले आके इहां हेलीकॉप्टर म बईठना कोनों सपना ले कम नई हे।
सक्ति जिला के कक्षा 12 वीं के टॉपर श्रेया पांडे ह बताईन कि हेलीकॉप्टर म बईठ के सफर करना बड़ रोमांचकारी रिहिस। अवईया बेरा म ओ ह अऊ अच्छा पढ़ई-लिखई करही जेखर बर ओला आज प्रोत्साहन मिले हे।
सक्ति जिला के ही बाराद्वार ले आए नोनी पायल यादव ह कहिन कि 10 वीं कक्षा म 96.8 प्रतिशत अंक ओला मिले हे। एखर सती मोला ए मऊका मिले हे जेखर ले में ह बड़ रोमांचित हों। मोला ए बात के खुशी होवत हे के अवईया बेरा म पढ़ई बड़ मन लगाके करहुं अऊ आगू घलो अईसे मऊका मिले जेखर कोशिश करहुं।
