छत्तीसगढ़िया अउ छत्तीसगढ़ी भाखा ऊपर होवइया लूट अउ शोषण ल उजागर करहि जोहार छत्तीसगढ़

रायपुर। आरजे इंटरटेनमेन्ट वर्ल्ड बैनर तले छत्तीसगढ़ी फिलम ”जोहार छत्तीसगढ़ ” के निरमान करे जाथ हे। ये फिलम ह छत्तीसगढ़ी क्रांति सेना के ऊपर आधारित हे, येमा छत्तीसगढ़िया और छत्तीसगढ़ी भाखा के उपर होवइया शोषण व लूट ल सिनेमा के माध्यम ले उजागर करे जाही। अउ इहां के मनखे मन के उपेक्षा कर बाहरी मनखे मन ल आगू करे के पीड़ा ल दरसाए जाही।
ये फिलम ह लोगन मन एक सारथक संदेश देही कि छत्तीसग़ढ़िया और छत्तीसगढ़ी भाखा के उपेक्षा कर के आगू नहीं बढ़े जा सकय। फिलम के प्रोड्यूसर राज साहू हे, अउ निर्देसक , लेखक व गीतकार देवेन्द्र जांगड़े हे। कलाकार म देवेन्द्र जांगड़े (तहलका मोर नाव के फेम) , हीरोइन सिखा चितंबरे (लैला टिप टॉप छैला अंगूठा छाप, माया 2 जइसे अब्बड़ अकन सुपर हिट मूवी के हीरोइन) अउ येखर अलावा राजू साहू घलो हे जेखर ये पहिली फिलम होही। उंखर अपोजिट म बी ए सेकंड ईयर के हीरोइन सोनाली सहारे हवय।फिलम के संगीत तय्यार करही सूरज महनांद ह। फिलम के सहनिर्देसक दीपक आदित्या हवय। प्रोडक्सन टीम म रोसन, सिखर,योगेस, विपिन, मनीस मन सामिल हे।
ये फिलम के सूटिंग शुकरवार के सुरू होइस हे जेमा पहुंना के रुप म अमित बघेल , छत्तीसगढ़िया क्रांति सेना प्रदेस अध्यक्छ ,डॉक्टर अजय यादव छत्तीसगढ़िया क्रांति सेना प्रदेस उपाध्यक्छ, मोहन सुन्दरानी फेमस निर्माता निर्देशक , डॉक्टर अजय सहाय अउ रामगुलाम ठाकुर हाजिर रहिन हे।