जगदलपुर/कोंडागांव। गांजा तस्कर के खिलाफ शिकंजा सकत पुलिस ह आज दू अलग-अलग थाना इलाका म डेढ़ करोड़ ले जादा के अवैध गांजा जब्त करिस हे। जेमा कोंडागांव पुलिस ह डेढ़ करोड़ के गांजा के संग ट्रक अउ एक आरोपी ल अउ नगरनार पुलिस ह एक टाटा सूमो ले 105 किलो गांजा के साथ दू आरोपी ल पकड़िन हे।
कोंडागांव एसडीओपी कपिल चंद्रा ल मुखबिर ले सूचना मिलीस कि जगदलपुर कोती ले आवत ट्रक से कुछ लोग अवैध गांजा लेके रायपुर तरफ जात हे। सूचना मिले के बाद पुलिस अधीक्षक सुजीत कुमार के निर्देशन अउ अतिरिक्त पुलिस अधीक्षक अनंत साहू के मार्गदर्शन म एसडीओपी चंद्रा ह सिटी कोतवाली पुलिस बल के साथ ट्रक क्रमांक एमपी 09 एचजी 5792 ल नारायणपुर तिराहा के पास रोकिस हे। ट्रक के तलाशी लेमा लगभग 1709 किलो अवैध गांजा बरामद होईस। तेखर बाद चालक संतोष गाडवाल (45) पिता सीता राम इन्दौर ल गिरफ्तार करे गिन। बता दें एखर दू दिन पहिली फरसगांव पुलिस ह घलो लगभग 52 किलो गांजा जब्त करे रिहिस।
इही तरह ले नगरनार पुलिस ह नाका लगाके वाहन के जांच करत रिहिन, इही दउरान सफेद रंग के टाटा सूमो ले 105 किलो गांजा बरामद करे गिन। जब्त गांजा के कीमत 5 लाख 35 हजार रूपिया आंके गे हे। गांजा तस्कर मन जगदलपुर कोती ले रायपुर तरफ आवत रिहिस। दूनो आरोपी ह उत्तरप्रदेश के रहवईया हरे। आरोपी मन के खिलाफ एनडीपीएस की धारा 20 ख के तहत मामला दर्ज कर ल न्यायालय म पेश करिन हे, जिहां ले न्यायालय ह वोमन ल जेल भेजीन हे।
