स्कूल म सांप डसे ले दू बच्ची के मौत, शिक्षिका अउ प्रधानपाठक निलंबित, अब दंडाधिकारी जांच
जशपुरनगर। जिला के बगीचा ब्लॉक के प्राइमरी स्कूल म पढ़इया दू छात्रा मन ला 26 जुलाई के सांप डस दिस, जेकर ले उंकर मौत हो गे। दूनों छात्रा मन ला स्कूल अवधि म सांप हा डस ले रिहिस। कलेक्टर श्री निलेशकुमार महादेव क्षीरसागर हा ये घटना के दण्डाधिकारी जांच के आदेश दे हें।
एस.डी.एम. बगीचा श्री रवि मित्तल ला जांच अधिकारी नियुक्त करे गे हे। कलेक्टर हा जांच अधिकारी ला सात दिन म घटना के विस्तृत जांच करके प्रतिवेदन दे बर केहे हें।
सांप डसे के बाद स्कूल के शिक्षिका श्रीमती अनुपमा तिर्की हा दूनों छात्रा मन ला इलाज बर स्वास्थ्य केन्द्र नई भेजके उंकर घर भेज दिस, कलेक्टर हा एला गंभीर लापरवाही मान के प्रधान पाठक हटकेश्वर यादव अउ सहायक शिक्षिका श्रीमती अनुपमा तिर्की ला तत्काल प्रभाव ले निलंबित कर दे हें।
कलेक्टर श्री निलेशकुमार महादेव क्षीरसागर हा ए घटना के जानकारी मिलतेच ही जिला शिक्षा अधिकारी अउ खंड शिक्षा अधिकारी ला तत्काल मौका म पहुंचे अउ घटना के बारे म विस्तृत रिपोर्ट दे के निर्देश दे रिहिन। खंड शिक्षा अधिकारी बगीचा हा ए मामला के जांच रिपोर्ट म बताए हें कि प्राइमरी स्कूल टटकेला के कक्षा तीसरी म अध्ययनरत छात्रा कुमारी पायल अउ कुमारी पावर्ती ला दोपहर 12 बजे सांप हा डस लिस।
इही दौरान स्कूल के प्रधानपाठक हटकेश्वर यादव बिना सूचना के अनाधिकृत रूप ले स्कूल ले गैर हाजिर रिहिस। स्कूल म मौजूद शिक्षिका श्रीमती तिर्की हा सांप डसे ले पीड़ित बच्ची मन ला अस्पताल नई भेजके उंकर घर भेजवा दिस। दूनों बच्ची के पालक मन घर म मौजूद नई रिहिन। रोपा लगाए बर खेत गे रिहिन।
उप सरपंच श्री धनुरजय यादव हा अपन खुद के वाहन ले दूनों बच्ची मन ला सामुदायिक स्वास्थ्य केन्द्र बगीचा लेके गिन। अस्पताल पहुंचे के पहिली ही कुमारी पायल के मृत्यु हो गे। दूसर बच्ची कुमारी पावर्ती के प्राथमिक ईलाज बगीचा म करे के बाद ओला बेहतर ईलाज बर अम्बिकापुर रवाना करे गिस, लेकिन रास्ता म ओकरो मौत होगे।
खंड शिक्षा अधिकारी हा अपन रिपोर्ट म दूनों छात्रा मन के मौत के घटना ला लेके स्कूल के प्रधानपाठक अउ शिक्षिका ला प्रथम दृष्टया दोषी माने हें। खंड शिक्षा अधिकारी के रिपोर्ट के आधार म दूनों झन ला निलंबित करे के साथ ही ए घटना के दण्डाधिकारी जांच के भी आदेश दिए गे हे।
