छत्तीसगढ़ म दु अऊ मरीज होइस स्वस्थ, एम्स ले मिलिस छुट्‌टी

जय जोहार…. कोरोना महामारी के बीच गुरुवार बिहिनिया छत्तीसगढ़ बर राहत भरी खबर हे। रायपुर के एम्स म भर्ती दु अऊ कोरोना संक्रमित मरीज ह स्वस्थ हो गे हे। दुनो मरीज के रिपोर्ट ह निगेटिव आय हे। जेखर बाद एम्स ले दुनो मरीज ल डिस्चार्ज कर दे गे हे। ठीक होवइया दुनो मरीज ह कोरबा के कटघोरा ले हे। अब सिर्फ दु कोरोना मरीज के एम्स म इलाज चलत हे। सूरजपुर अऊ जशपुर के 10 सस्पेक्टेड मरीज मन के फाइनल रिपोर्ट ह आज अवइया हे।

बता देन कि बीते मंगलवार के सूरजपुर क्वारेंटाइन सेंटर म एक श्रमिक ह कोरोना पाजिटिव पाए गे रहिस। जेखर बाद ओखर संपर्क म आय सबो लोग मन के जांच रैपिड किट ले करे गिस। जेमा क्वारेंटाइन सेंटर के एक सिपाही के संग 9 लोग मन के रिपोर्ट ह कोरोना पाजिटिव आइस। ऊहचे पत्थलगांव म घलो क्वारेंटाइन सेंटर म ठहरे एक श्रमिक के रिपोर्ट ह रैपिड किट जांच म पाजिटिव आइस। जेखर बाद ए लोग के सैंपल ले के एम्स रायपुर भेजे गिस, जेखर रिपोर्ट आज अवइया हे।