राज्य म पहिली बार डिप्टी सीएम: अईसे मिलिस टीएस सिंहदेव ल कुर्सी.. जानव जम्मो राजनीतिक घटनाक्रम.. का हे एखर मायने

रायपुर. देस के राजधानी दिल्ली म कांग्रेस के केंद्रीय नेतृत्व संग छत्तीसगढ़ के वरिष्ठ नेता मन के बईठका म प्रदेस के स्वास्थ्य मंत्री टीएस सिंहदेव ल उपमुख्यमंत्री बनाए के फईसला होए हे। कांग्रेस के राष्ट्रीय महासचिव (संगठन) केसी वेणुगोपाल ह सिंहदेव ल उपमुख्यमंत्री बनाए के घोसना करिन। राज्य बने के बाद ए पहिली दरी होवत हे कि कोनों नेता ल उपमुख्यमंत्री के जिम्मेवारी सौंपें गे हे। आखिर काबर ले गिस ए फईसला ल अऊ का हे एखर राजनीतिक मायने… सियासी गलियारा म ए बात के खुबेच चरचा होवत हे।

कांग्रेस के उच्च पदस्थ सूत्र मन कहिथे कि टीएस सिंहदेव ल उपमुख्यमंत्री बनाए के पहिली केन्द्रीय नेतृत्व ह सरकार अऊ संगठन ले रिपोर्ट ले रिहिस। मुख्यमंत्री भूपेश बघेल ह पाछू के चार बछर म होए काम-बुता के ब्यौरा ल पेस करिन। प्रदेश कांग्रेस अध्यक्ष मोहन मरकाम ह संगठन के गतिविधि ल लेके जानकारी दिन।

बताए जात हे कि सीएम बघेल अऊ मरकाम के रिपोर्ट के बाद केंद्रीय संगठन कोती ले अपन सर्वे के रिपोर्ट रखे गिस। जेन रिपोर्ट म कहे गे रिहिस कि टीएस सिंहदेव ल मुख्यमंत्री नई बनाए जाए ले नाराजगी के बात सामने आ‌वत हे। सिंहदेव के पंचायत विभाग के जिम्मेवारी ल छोड़े ले पार्टी के किरकिरी होवत हे उहें जनता म घलो गलत संदेस जावत हे। ए रिपोर्ट के बाद केंद्रीय संगठन ह मंत्री ताम्रध्वज साहू, शिव डहरिया, कवासी लखमा, मोहम्मद अकबर वरिष्ठ विधायक सत्यनारायण शर्मा, धनेंद्र साहू के घलो राय लिस। जम्मो नेता मन केंद्रीय संगठन के सर्वे ल लेके अपन पक्ष रखिन।

ओखर बाद राष्ट्रीय महामंत्री संगठन कोती ले टीएस सिंहदेव ल उपमुख्यमंत्री बनाए जाए के प्रस्ताव रखिन। विधानसभा चुनाव म पार्टी के दोबारा जीत बर सिंहदेव ल उपमुख्यमंत्री बनाए के फईसला ल केन्द्रीय संगठन ह जरूरी मानिस। जेखर बाद सिंहदेव ल उपमुख्यमंत्री बनाए के घोसना होईस।

आखिर काबर मिलिस सिंहदेव ल जिम्मेवारी..?  

पाछू के विधानसभा चुनाव म टीएस सिंहदेव ह कांग्रेस घोसना पत्र समिति के अध्यक्ष रिहिन। कांग्रेस के घोसणा पत्र म भरोसा करके जनता ह अपन वोट दे रिहिन अऊ कांग्रेस के सरकार बनिस। पाछू के साढ़े चार बछर म कई बेरा आए रिहिस जब सिंहदेव ह घोसणा पत्र के वादा मन ल पूरा करे म असमर्थता जताए रिहिस। सरगुजा रियासत के राजा टीएस सिंहदेव के पक्ष म क्षेत्र के जनता ह ओखर पाछू खड़े रिहिस। एखरे सती पाछू के विधानसभा चुनई म सरगुजा के 14 विधानसभा सीट के जम्मो सीट म कांग्रेस के जीत होईस। क्षेत्र की जनता ह सिंहदेव के चेहरे ल देखके अपन वोट दे रिहिन। अब उंखर उपमुख्यमंत्री पद के जिम्मेवारी मिले के फईसला ल सरगुजा के डैमेज कंट्रोल के रूप म देखे जात हे।  

टीएस सिंहदेव के परिचय

त्रिभुवनेश्वर शरण सिंहदेव के जनम 31 अक्टूबर 1952 म इलाहाबाद म सरगुजा के शाही परिवार व होए रिहिस। उंखर पिता एमएस सिंहदेव मध्य प्रदेश के मुख्य सचिव पद ले रिटायर होए रिहिन। उहें मां देवेन्द्र कुमारी मध्य प्रदेश सरकार म मंत्री रिहिन। सिंहदेव ह हाईस्कूल के पढ़ई-लिखई सिंधिया स्कूल ग्वालियर ले करे रिहिन। ओखर बाद दिल्ली के हिंदू कालेज ले इतिहास म स्नातक के उपाधि लिन। भोपाल के हमीदिया कालेज ले ओमन पोस्ट ग्रेजुएशन करिन।

सिंहदेव के राजनीतिक जिनगी के सुरुआत अंबिकापुर नगर परिषद ले सुरू होए रिहिस। ओमन 1983-88 अऊ 1995-99 म इहां के अध्यक्ष रिहिन। 2008 म सरगुजा के अंबिकापुर विधानसभा सीट ले ओमन विधायक चुने गिन। ओखर बाद 2013 अऊ 2018 म घलो जीतके विधायक बनिन। 2013 विधानसभा चुनाव के बाद ओमन ल कांग्रेस विधायक दल के नेता बनाए गिस। उहें बछर 2018 म कांग्रेस सरकार बने के बाद ओमन ल स्वास्थ्य, वाणिज्यकर अऊ पंचायत एवं ग्रामीण विकास विभाग के मंत्री बनाए गिस। पाछू के साल ओमन ह पंचायत विभाग ल त्याग दे रिहिन।