बलौदाबाजार। नजायज संबंध के शक म एक आदमी हा पहिली तो अपन पत्नी के हत्या कर दिस। ओकर बाद जेकर संग संबंध ला लेके शक रिहिस ओकरो ऊपर घलो हमला करिस अउ भाग गे। एकर बाद वो आदमी हा खुद जहर खाके जान दे दिस।
वारदात के बाद वो आदमी फरार चलत रिहिस। पुलिस ला शनिवार के ओकर लाश मिलिस। पुलिस ला ओकर पास ले सुसाइड नोट मिले हे, जेमा पत्नी के संग अवैध संबंध ला लेके वारदात ला अंजाम दे के बात केहे हे। पूरा मामला कसडोल थाना क्षेत्र के आय।
जानकारी के मुताबिक, कसडोल थाना क्षेत्र म लवन चौकी के ग्राम अहिलदा म 17 जुलाई के रात एक साथ दू झन के ऊपर हमला करे गिस। जेमा एक झन महिला माहेश्वरी साहू अउ और दूसरा आदमी गांव के ही कृषि साख समिति के चौकीदार भुवनेश्वर साहू हे। दूनों झन के ऊपर कोनो नकाबपोश हा टंगिया ले वार करे रिहिस।
एकर बाद उंकर मन गंभीर हालत म दूनों झन ला लेके सामुदायिक स्वास्थ्य केंद्र लवन पहुंचिन, जिहां डॉक्टर मन महेश्वरी ला मृत घोषित कर दिस। उहें भुनेश्वर के नाजुक स्थिति ला देखत रायपुर रेफर कर दे गिस।
घटना के बाद ले ही महेश्वरी के पति कमल साहू लापता रिहिस। अइसे म संदेह के घेरा म रिहिस अउ ओकर लगातार तलाश करे जावत रिहिस। इही बीच शनिवार के ग्राम अहिलदा ले लगे गांव कोरदा म कमल के शव बरामद होईस।
पुलिस ला उहां पांच पन्ना के सुसाइड नोट मिलिस अउ जहर के शीशी घलो बरामद होए हे। परिजन मन पुलिस ला बताए हें कि कमल हा अपन पत्नी अउ गांव के ही भुनेश्वर साहू के चरित्र पर शंका करत रिहिस।
सुसाइड नोट म कमल हा घलो लिखे हे कि ओहर अपन पत्नी ला कई बार समझाईस, लेकिन भुवनेश्वर से मिलना नई छोड़िस। एकर चलत ही ओकर हत्या कर दिस।
No Comment! Be the first one.