जशपुर । जिला मुख्यालय ले 100 किलोमीटर दूर पत्थलगांव विकासखण्ड के झिमकी गांव के सरकारी स्कूल कैम्पस म बिहनिया परथना के बाद जइसे ही छात्र-छात्रा मन अपन कक्क्षा के ओर जाए लगिस, तभे मधुमक्खि मन ह हमला बोल दिस। ये घटना म 30 पढ़इया लइका घायल होगे। उहें दो राहगीर घलो मधुमक्खि मन के काटे ले घायल होगे। घटना के खबर पा के पत्थलगांव विधायक शिवशंकर साय अउ एसडीएम विजय खेस्स ह पहुंच के घायल मन के मदद करिस हे। मधुमक्खि मन के हमला से स्कूल कैम्पस म भगदड़ मच गिस। ये भगदड़ म कई स्टूडेंट ह क्लास रूम म जल्दी ल घुसके दरी ल ओढ़के बचे के कोशिश करिस। एती क्लास रूम के अंदर घलो मधुमक्खि मन घुसके लइका मन ल डंक मार के घायल कर दिस। घायल 30 लइका मन म 2 के हालत गंभीर हे । येमा एक बच्ची तो हार्ट पेशेंट घलो हे, जेला विधायक शिवशंकर साय ह अपन गाड़ी ले पत्थलगांव अस्पताल भिजवाइस।
बेमेतरा म सड़क हादसा, 16 यात्री जिला अस्पताल म भरती
बेमेतरा म मंगलवार के बड़े सड़क हादसा होगे। जेमा 16 यात्री घायल होगे। घायल मन ल इलाज बर बेमेतरा के जिला अस्पताल म भरती कराए गेहे। मिले जानकारी म यात्री बस बेमेतरा के गांव कठिया मोड़ के पास पलट गिस। बस रायपुर ले कवर्धा जात रिहिस हे। घटना स्थल म पुलिस अधिकारी पहुंच चुके हे। अपना ट्रैवल्स के बस म 50 ले जादा यात्री सवार रहिन हे।
घोघरानाला के कुस्ठ बस्ती के लोगन मन अधिकारी मन ल ज्ञापन सउपिस
जांजगीर के घोघरानाला के कुस्ठ बस्ती के लोगन मन अधिकारी मन ल ज्ञापन सउपके समस्या ल दूर करे के मांग करिन हे। आप मन ल बता दन कि लोगन मन मोहल्ला म ब्याप्त अनेक समस्या के संग ही जादा बिजली बिल के संग मकान टैक्स जइसे आर्थिक दिक्कत ले अवगत कराइन। उहें पानी के दिक्कत के चलत सौर ऊर्जा ले चलित पम्प लगाए के मांग करिन। जेकर उपर अधिकारी मन उचित पहल के आस्वासन दे हे।
भिलाई म भारत बंद के असर दिखिस
दुर्ग जिला म भारत बंद के असर दिखिस। बंद के कारन भिलाई इस्पात संयंत्र के सेक्टर दू अऊ सेक्टर छह के बाजार के ताला नइ खुलिस। मंगलवार के बंद के कारन सेक्टर चार के चाइना बाजार जेमा लाखों के रोज ब्यापार होथे, ओहर पूरा बंद हे। बाजार म असर डाले के बाद आरक्षन बिरोधी मंच के लोगन मन सड़क म घलो उतरिन। इलाका म पुलिस के चाक चौबंद बेवस्था करे गिस हे।
No Comment! Be the first one.