Corona: बलौदाबाजार जिला म मिलिस कोरोना के 11 नवा मामला, एक्टिव केस ह बाढ़ के अब 39

जय जोहार…. छत्तीसगढ़ म कोरोना (corona) संक्रमित मरीज मन के संख्या ह सरलघा बाढ़त जावत हे। प्रदेश के बलौदाबाजार जिला म इतवार के कोरोना के 11 नवा मरीज मिले हे। एखर पुष्टि ल जिला प्रशासन ह करे हे।

आज जेन नवा मरीज मिले हे, ओमा पलारी नगर ले 5, भाटापारा नगर ले 3, कसडोल नगर ले 1 मरीज शामिल हे। संगेसंग आन दू मरीज ह गांव म रहवइया हे।

जिला मुख्य स्वास्थ्य अउ चिकित्सा अधिकारी डॉ खेमराज सोनवानी ह बताइय कि सबो मरीज मन ल (corona) कोविड अस्पताल लाय बर एंबुलेंस ल रवाना कर दे गे हे।

आज मिले सबो मरीज मन ल मिला के जिला म कोरोना (corona) संक्रमित मरीज मन के संख्या ह बाढ़ के 335 पहुंच गे हे। जेमा ले एक्टिव मरीज मन के संख्या ह 39 हे। ऊहचे 296 मरीज ह बने होय के बाद अपन घर लहुट चुके हे।