आरएसएस के खेलाफ परचा …भगवा आतंकवाद बतात हुए ग्रामीन मन ल  बचके रहे  के अपील करिन

नक्सली मन के 2 ले 8 दिसंबर तक पीएलजीए सप्ताह

रायपुर। नक्सली मन ह  बस्तर के कुछ अंदरुनी इलाका मन म  बइनर-पोस्टर लगाके 2 ले 8 दिसंबर तक पीएलजीए सप्ताह मनाय के घोषना करिन हे । बइनर म ग्रामीमन ले नक्सलवाद के संग जुड़े के अपील करत हुए सोसक अउ  सासक वर्ग ले सावधान रहे बर कहे गेहे। संग ही नक्सली मन ह कुछु गांव मन  म आरएसएस के खेलाफ परचा घलो बांटिन हे। नक्सली मन ह परचा म आरएसएस के भगवा आतंकवाद बतात हुए ग्रामीन मन के एखर ले बचके रहे बर कहिन हे।

बइनर, पोस्टर अउ परचा के सूचना मिले म  पुलिस प्रसासन अलरट हो गिस हे। सुरक्षा बल मन  गांव-गांव म  सर्चिंग अभियान चलावत हे।  चूंकि 7 दिसम्बर के तेलंगाना म विधान सभा चुनाइ होवइया हे अउ पाछु दिन मन होए इनकाउंटर म 9 नक्सली घलोक मारे गिस हे । इला देखत हुए अइसे आसंका व्यक्त करे जात हे के  नक्सली पीएलजीए सप्ताह के दउरान कोनो बड़े वारदात ल अंजाम देके अपन साथी मन के मउत के बदला ले सकत हे।

उहें नक्सली मन के केंद्रीय कमेटी के महासचिव बसवराजू के पदभार संभाल ले के बाद नक्सली मन  आक्रमक होए के घलोक आसंका जाहिर करे जात हे।  हालांकि छत्तीसगढ़ पुलिस के वरिष्ठ अफसर मन केकहिना हे ए सबो बात मन ले नक्सली मन के खेलाफ चलत आक्रमक अभियान म कोनो फरक नइ पड़ही।