विधायक विकास उपाध्याय ह मच्छी तरिया के सौंदर्यीकरण काम के करिस निरीक्षण

रायपुर। गुढ़ियारी के मच्छी तरिया म सौंदर्यीकरण के काम चलत हे, जेमा घटिया निरमान सामग्री के इस्तेमाल कर के ठेकेदार ह लीपापोती करत रिहिस। ये काम ह दु-तीन महिना ले बंद घलो रिहिस हे। जेखर शिकायत उहां के रहइया लोग मन ह विधायक विकास उपाध्याय ले करे रिहिस। ओखर मन के शिकायत म आज विधायक विकास उपाध्याय अउ नगर निगम आयुक्त शिव अनंत तायल के संग तरिया सौंदर्यीकरण काम के निरीक्षण करिस।

विधायक ह ठेकादार ल बरसात के मौसम ल देख के काम जल्दी पूरा करे बर कहिस अउ गुणवत्तापूर्ण निरमान सामग्री के उपयोग करे के समझाइश दिस। संगे संग तरिया म दु ठन वॉटर हार्वेस्टिंग सिस्टम, शौचालय अउ तरिया पर म शेड बनाय बर ठेकादार ले बात घलो करिस। इही मौका म विधायक विकास उपाध्याय ह लोग मन ले अपील करिस कि कहूं कुछू भी निरमान काम म गुणवत्ताहीन सामग्री के उपयोग करे जाथे त येखर शिकायत मोर से करहू। इही मौका म एमआईसी सदस्य अउ पार्षद श्रीकुमार मेनन के संगे संग अब्बड झन कांग्रेस कार्यकर्ता अउ नागरिक मन ह मौजूद रिहिस हे।