दिहाड़ी मजदूर के बेटी दामिनी हा बुल्गारिया म लहराईन तिरंगा, योग म कमाइन नाम
रायपुर। दिहाड़ी मजदूर के बेटी दामिनी साहू हा छत्तीसगढ़ के नाम दुनिया के योग पटल म दर्ज करा दीन। दामिनी हा 28 ले 30 जून के बीच बुल्गारिया म होए वर्ल्ड योगा फेस्टिवल म दू सिल्वर मेडल अपन नाम करिन।
7 कैटेगिरी म होए ये प्रतियोगिता म चीन, न्यूजीलैंड, इंग्लैंड समेत 16 देस के खिलाड़ी मन ने हिस्सा लिन हें। एमा छत्तीसगढ़ के तीन खिलाड़ी के साथ ही भारत के 19 खिलाड़ी सामिल रिहिन। कोच संतोष आनंद राजपूत के मार्गदर्शन म ये सबो खिलाड़ी मन विदेस म नाम रोशन करे हें। वर्ल्ड योग फेस्टिवल म प्रदेश के तीनों खिलाड़ी मन अलग-अलग कैटेगिरी म सिल्वर मेडल अपन नाम करिन। मेडल जीत कर घर आइन त ये खिलाड़ी मन के जोरदार स्वागत करे गिस।
ये सबो खिलाड़ी मन म दामिनी साहू के जीत हा खास हे, जे हा उंकर परिवार अउ पिता के देन हे। दामिनी के पिता परदेसीराम साहू एक हाथ ले दिव्यांग हे। वो हा मजदूरी अउ मेला-मड़ई म गुब्बारा बेचके परिवार के भरण पोषण करथें।
ए सबके बावजूद ओमन अपन बेटी दामिनी ला गरीबी अउ तंगहाली म घलो सिक्षा देलाईन, जेकर ले वो हा ये काबिल बन सकिन।
धमतरी म कुरुद के दर्रा गांव के रहवइया 21 साल के दामिनी हा 11 साल के उम्र ले योग करत हें। गांव के मिडिल स्कूल म क्रीडा शिक्षक ले प्रेरित होके दामिनी हा अपन ये अभ्यास ला निरंतर जारी रखिन। दामिनी के मुताबिक, वो हा योग म ही करियर बनाना चाहथे अउ अपन पांव म खड़ा होना चाहथे।
