बिलासपुर के बेटी साक्षी बागड़ीकर ह देश के टॉपर लिस्ट म दूसर… दुर्ग के साक्षी ह तीसर नम्बर म
रायपुर। केंद्रीय माध्यमिक शिक्षा बोर्ड (सीबीएसई) के दसवीं म बिलासपुर के बेटी साक्षी बागड़ीकर ह प्रदेश म टॉपर बने के संगे-संग देश के टॉपर लिस्ट म दूसर स्थान प्राप्त करिन हे। त दुर्ग के साक्षी माहेश्वरी घलोक मेरिट लिस्ट म अपन स्थान बनाइस। दूनों साक्षी के नंबर में महज 1 अंक के अंतर हे।
मिले जानकारी म बिलासपुर के तिलक नगर के रहइया छात्रा साक्षी भागड़ीकर ह केंद्रीय माध्यमिक शिक्षा बोर्ड के दसवीं के परीक्षा म 498 अंक हासिल कर के अपन घर परिवार के नाम रोशन करिन हे। बिलासपुर के ब्रिलियंट स्कूल के छात्रा साक्षी ह कहिन कि वो ह रोजे दिन पांच ले छह घंटा तक पढ़ाई करत रहिस हे।
इसरो के वैज्ञानिक बनना चाहत हे साक्षी
ब्रिलियंट पब्लिक स्कूल बिलासपुर के छात्रा साक्षी ह अपन पढ़ाई के सक्सेस मंत्र बताइन कि वो ह देश के विख्यात वैज्ञानिक स्वर्गीय डॉक्टर एपीजे अब्दुल कलाम ल अपन प्रेरणा मानत हे। आघू 11वीं के पढ़ाई ल वो ह मैथ्स अउ साइंस के संग करके इसरो म वैज्ञानिक बनना चाहत हे।
बेहतर अनुसंधान के हे इरादा
साक्षी ले पूछे गिस कि उंखर माता-पिता डॉक्टर हे, फेर वो ह डॉक्टर काबर नइ बनना चाहत हे। त वो ह जवाब दिस कि देश ल अब अइसे साइंटिस्ट के जरूरत हे, जे ह इलाज के क्षेत्र म घलोक बेहतर इनोवेशन करय। अउ अगर वो ह साइंटिस्ट बनके ये तरह के कोनो इनोवेशन करत हे त सैकड़ों हजारों म नइ, लाखों डॉक्टर मन के मदद कर सकही।
दुर्ग के साक्षी ह हासिल करिन 497 अंक
येकर अलावा छत्तीसगढ़ के मेरिट लिस्ट म दुर्ग के छात्रा घलोक जगह हासिल कर हे। संयोग ले ये छात्रा के नाम घलोक साक्षी हे। भिलाई के छात्रा साक्षी माहेश्वरी ह 497 अंक हासिल करे हे। अउ देश के मेरिट लिस्ट में जगह बनाइस हे।
