मालिक के बेटा ल चाब दिस सांप, नौकर ह हिम्मत दिखात बचाईस हे उंखर जान

जांजगीर-चांपा।  आज के ये दउर म हर व्यक्ति दूसर बर कुछ करे ले पहिली अपन बारे म सोचथे।  फेर आज घलो समाज म कुछ लोगन अईसे हे जेन ह खुद ले पहिली दूसर के परवाह करथे। एखर ताजा उदाहरण हे परमेश्वर साहू ह, जेन ह अपन जान ल जोखिम म डाल के मालिक के बेटा के जान बचाईस हे।

जानकारी के मुताबिक चांपा के बरछापारा म गंगाराम देवांगन के हैंडलूम के कारखाना हे, जिहां परमेश्वर देवांगन घलो काम करथे। मालिक गंगाराम के 12 साल के लइका कुणाल देवांगन ल एक जहरीले सांप ह चाब दिस, ये दउरान परमेश्वर ह  उहां मौजूद रिहिन। वो ह हिम्मत दिखात खुद के जान के परवाह नई  कर, मालिक के बेटा के शरीर म जहर ल फैले ल रोके बर जहर ल चूस-चूस के बाहर निकालिस हे।

परमेश्वर ह किशोर के कलाई म पट्टी बांध के अपन मालिक ल एखर सूचना दिस। एखर बाद दूनो झन ल निजी अस्पताल म भर्ती कराए गिन हे, जिहां दूनो झन अब खतरा ले बाहिर हे। परमेश्वर ल अस्पताल ले छुट्टी मिल गे हे, उंहे कुणाल ह अभी अस्पताल म भरती हे।