Raipur : मुख्यमंत्री ह सामाजिक भवन बर भूमि आबंटन प्रक्रिया के दीन जानकारी

जय जोहार। (Raipur ) मुख्यमंत्री भूपेश बघेल ह मंगलवार संझा डोंगरगढ़ म विभिन्न समाज अउ सामाजिक संगठन के प्रतिनिधि मण्डल ले भेंट-मुलाकात करीन । मुख्यमंत्री ह ए मउका म एक-एक कर के सबो समाज अउ संगठन के प्रतिनिधि मन ले सामाजिक गतिविधि के संबंध म जानकारी लीन। संगेसंग ओखर ले सासकीय योजना अउ कार्यक्रम के क्रियान्वयन के संबंध म घलो फीडबैक लीन ।

(Raipur ) मुख्यमंत्री ह किहीन कि भेंट-मुलाकात के दउरान सामाजिक भवन निर्माण के मांग ल प्रमुखता ले मनखे मन करत हे । हमर मन के मंसा हे कि छत्तीसगढ़ के सबो समाज अउ वर्ग के मनखे सामाजिक रूप ले मजबूत हों अउ सामाजिक गतिविधि के आयोजन बर ओखर स्वयं के सामुदायिक भवन हो, एला धियान म रखत हुए सामाजिक भवन के निर्माण बर रियायती दर म भूमि उपलब्ध कराय के प्रावधान हमन ह करे हंन ।

मुख्यमंत्री भूपेश बघेल ह कोसरिया समाज के भवन के निर्माण बर 12 लाख, कच्छ गुर्जर गुजराती क्षत्रिय समाज के सामुदायिक भवन म अतिरिक्त कमरा निर्माण बर 10 लाख रुपिया, सरयूपारीण ब्राम्हण समाज के सामुदायिक भवन म अतिरिक्त कमरा अउ अहाता निर्माण बर 15 लाख, पवार क्षत्रिय समाज ल सामाजिक हॉल के निर्माण बर 10 लाख अउ मुस्लिम समाज के भवन बर 20 लाख स्वीकृत करे जाय के घोसना करीन।