कमल फूल लेके लड़ही चुनई, मुख्यमंत्री कोन होही कमेटी तय करहीः ओम माथुर

भाजपा के छत्तीसगढ़ प्रभारी ओम माथुर भाजपा कार्यसमिति के बैठक म संघरे बर अपन एक दिवसीय प्रवास म दंतेवाड़ा पहुंचिन अऊ ओमन विधानसभा समिति के बैठक लिन। अवईया महीना म छत्तीसगढ़ म चुनई होवईया हे। अऊ भारतीय जनता पार्टी अपन जीत के संकल्प लेके लगातार छत्तीसगढ़ म कांग्रेस सरकार के विफलता ल गिनावत अऊ वादा खिलाफी के गोठ करत जनता के बीच पहुंचत हे। प्रदेश प्रभारी ओम माथुर ह कहिन कि हमन दू हिस्सा म टीम बनाके विधानसभा चुनाव लड़बो। एक टेक्नीकल टीम अऊ दूसर पालिटिकल टीम। कोर टीम विधानसभा म बुता करही। हमर पास कार्य़कर्ता के कमीं नई हे छोटे-छोटे टीम बना के हमन बुता करबो।

कौन होही मुख्यमंत्री के चेहरा ए बात बर ओम माथुर कहिन कि भाजपा सिस्टम वाला पार्टी हरे। हमर पार्टी कोनों एक परिवार के पार्टी नोहे। चुनाव मैदान म हमन हाथ म कमल का फूल ल लेके जाबो। मुख्यमंत्री कोन होही ए केन्द्रीय कमेटी तय करही। कर्नाटक हार के के हमर केन्द्रीय कमेटी मंथन करत हे। उहें झीरम कांड म नार्को टेस्ट के सवाल ले लेके ओमन कहिन कि कांग्रेस बचकाना हरकत करत हे। उहें नक्सली समस्या ल लेके ओमन कहिन कि मिल के एखर ले निपटना होही। ए ह राष्ट्रीय समस्या हे, केन्द्र अऊ राज्य सरकार ल मिल के एखर ले लड़ना होही।

बता देन कि छत्तीसगढ़ प्रदेश भाजपा प्रभारी व पूर्व राजयसभा सांसद ओम माथुर बस्तर संभाग के चार दिवसीय प्रवास म आए हे। इही प्रवास के दौरान ओम माथुर दंतेवाड़ा पहुंचे रिहिन। माथुर के आए के बेरा म कारली हैलीपेड ले लेके विश्रामगृह दंतेवाड़ा तक युवा मोर्चा कोती ले भव्य बाइक रैली के माध्यम ले जोशीला स्वागत करे गिन। एखर बाद मीडिया अऊ पत्रकार मन ले रूबरू होईन। तय कार्यक्रम के तहत विधानसभा कोर कमेटी अऊ जिला कार्यसमिति के बईठका म ओमन संघरिन अऊ आगामी चुनई ल लेके रणनीति बनाए गिस। भाजपा प्रभारी संग बस्तर के पूर्व सांसद दिनेश कश्यप, राजनांदगांव सांसद संतोष पांडे, संगठन महामंत्री पवन साय, पूर्व मंत्री केदार कश्यप, श्रीनिवास मद्दी सहित दंतेवाड़ा विधानसभा के भाजपा कार्यकर्ता मन संघरे रिहन।