सुशासन तिहार :आवेदन के कुछे घंटा में कौशिल्या ला मिलिस आयुष्मान कार्ड, खिल उठिस चेहरा
रायपुर. राज सरकार के मंशा के मुताबिक आम जनता के समस्या के तुरते निपटारा बर आयोजित ‘सुशासन तिहार’ सिबिर ह गाँव वाले मन बर बरदान साबित होवत हे। एही कड़ी में बलौदाबाजार-भाटापारा जिला के ग्राम पंचायत मोहतरा में आयोजित जनसमस्या निवारण सिबिर में प्रसासन के संवेदनसीलता के एक सुग्घर मिसाल देखे ला मिलिस, जहाँ गाँव मोहतरा के रहइया महिला कौशिल्या साहू ला आवेदन करे के संग ही तुरते आयुष्मान कार्ड दिय गिस।
मोका में ही होइस समाधान
सिबिर में अपन स्वास्थ्य ले जुड़े चिंता ला लेके पहुँचे कौशिल्या साहू ह जैसे ही आयुष्मान कार्ड बर अपन आवेदन दीस, संबंधित विभाग के अधिकारी फुर्ती देखाइन। ओही मेर पात्रता के जाँच करके ऑनलाइन काम ला पूरा करे गिस अउ तुरते कार्ड प्रिंट करके ओला सौंप दिय गिस।
गाँव वाले के दुआर तक पहुँचे सरकार
हाथों-हाथ आयुष्मान कार्ड मिले ले कौशिल्या साहू ह खुसी जतावत कहिस— “पहिली छोटे-छोटे काम बर सरकारी दफ्तर के कतको चक्कर काटे बर परत रहिस, फेर सुशासन तिहार के जरिया अब सरकार खुद हमर दुआर तक आवत हे।” ओ ह ए तुरते मिले सुबिधा बर मुख्यमंत्री विष्णुदेव साय ला धनबाद देवत कहिस कि ए कार्ड ह ओकर परिवार बर स्वास्थ्य सुरक्षा के गारंटी आय।
सुशासन के नवा मिसाल
जनसमस्या निवारण सिबिर के जरिया मिलत ए तुरते समाधान के गाँव देहात में भारी तारीफ होवत हे। प्रसासन के ए काम करे के तरीका ले न केवल सरकारी काम में पारदरसिता आए हे, बल्कि आम मनखे के भरोसा घलो सासन-प्रसासन ऊपर अउ मजबूत होय हे।
