जीपीएम जिला ला मिलीस न्यायिक विकास के बड़े सौगात
- मुख्य न्यायाधीश रमेश सिन्हा ह करिन वर्चुअल भूमि पूजन
- पेंड्रारोड म आवासीय परिसर अउ मरवाही म बनही आधुनिक सिविल कोर्ट भवन
रायपुर. छत्तीसगढ़ उच्च न्यायालय बिलासपुर के मुख्य न्यायाधीश रमेश सिन्हा ह आज गौरेला-पेंड्रा-मरवाही जिला ला बड़े न्यायिक सौगात दीन। ओमन पेंड्रारोड म न्यायिक करमचारी बर जम्मो सुविधा ले भरे आवासीय परिसर अउ मरवाही म नवा सिविल कोर्ट भवन के निर्माण काम के वीडियो कॉन्फ्रेंसिंग के जरिया भूमि पूजन अउ सिलानेस करिन। ए बड़े कोसिस ले जिला के न्यायिक वेवस्था ला मजबूती मिलही, संग ही न्यायिक अधिकारी अउ करमचारी ला बने बुनियादी सुविधा मिल सकही।
मुख्य न्यायाधीश रमेश सिन्हा ह कार्यक्रम ला वर्चुअल संबोधित करत जिला न्यायाधीश अउ लोक निर्माण विभाग (PWD) के अधिकारी ला निर्देश दीन कि जम्मो निर्माण काम सासन कोती ले तय करे गे NIT मानक के हिसाब ले अउ बने गुनवत्ता के संग कराए जायं। ओमन कहिन कि न्यायिक भवन अउ आवासीय परिसर के निर्माण आधुनिक सुविधा, सुरक्षा अउ जरूरत ला धियान म रखत करे जाय, ताकि ये निर्माण पूरा परदेस बर एक मिसाल बन सके।
ए मौका म छत्तीसगढ़ हाईकोर्ट के पोर्टफोलियो जज रजनी दुबे घलो वर्चुअल माध्यम ले कार्यक्रम म सामिल रहिन। पेंड्रारोड म न्यायिक करमचारी बर कुल 26 आवास बनाए जाही। जेम 8 जी-टाइप, 10 एच-टाइप अउ 8 आई-टाइप के घर सामिल हें। ये आवासीय परिसर आधुनिक सुविधा ले लैस होही, जेकर ले करमचारी ला रहे बर सुग्घर माहौल मिलही। उहें मरवाही म बनइया नवा सिविल कोर्ट भवन ला आज के जरूरत के हिसाब ले बनाए जाही, जेकर ले छेत्र के मनखे मन ला कोर्ट-कचहरी के काम म जादा सुविधा अउ सुगमता मिलही।
मुख्य न्यायाधीश कोती ले वर्चुअल भूमि पूजन के बखत पेंड्रारोड म मुख्य न्यायिक मजिस्ट्रेट महेशबाबू साहू अउ कलेक्टर, पुलिस अधीक्षक समेत प्रसासनिक अधिकारी, न्यायिक अधिकारी अउ करमचारी मौजूद रहिन। संग ही पूरा परदेस के न्यायाधीश घलो वर्चुअल माध्यम ले ए कार्यक्रम म जुड़े रहिन।
