Mahasamund : बायपास रद्दा के संग बेलसोंडा के तीर ओवर ब्रिज निर्माण बर जल्दीच मिल सकथे स्वीकृति
जय जोहार । महासमुन्द (Mahasamund) म बायपास रद्दा अउ बेलसोंडा रेलवे क्रासिंग म ओवर ब्रिज बर अवइया दिन म क्षेत्र वासी मन ल खुसख़बरी मिल सकत हे । संसदीय सचिव विनोद सेवनलाल चंद्राकर के पहल अउ पत्र के बाद केंद्रीय मंत्री नितिन गडकरी ह ए दिसा म उचित पहल बर संबंधित अफसर ल आवश्यक निर्देस देहे।
गौरतलब हे कि संसदीय सचिव अउ (Mahasamund) विधायक श्री चंद्राकर ह 21 अप्रैल 2022 के सड़क परिवहन मंत्री नितिन गडकरी ल पत्र लिखकर बायपास रद्दा अउ बेलसोंडा रेलवे क्रासिंग म ओवर ब्रिज निर्माण के स्वीकृति बर पत्र लिखे हे जेमा केंद्रीय मंत्री श्री गडकरी ह एखर बर संबंधित अफसर ल आवश्यक निर्देस देहे । ए जानकारी ल केंद्रीय मंत्री श्री गडकरी ह पत्र के माध्यम ले संसदीय सचिव श्री चंद्राकर ल जानकारी दीन हे ।
उहें स्थानीय अधिकारी मन ह बताइन कि बेलसोंडा रेलवे क्रासिंग म बनइया ब्रिज के रेलवे ले ड्राइंग पास हो गेहे अउ ड्राइंग-डिजाइन बनाके सड़क मंत्रालय ल भेजे गेहे । जल्दीच ही बायपास अउ ओवर ब्रिज निर्माण के स्वीकृति मिल सकत हे ।
