गनेस हाथी हा फटफटी सवार युवक ला पटक-पटक के मार डरिस, अब तक 7 झन के ले डरे हे जान
रायगढ़ | धरमजयगढ़ वनमंडल के छाल रेंज म गनेस हाथी हा एक झन बाइक सवार युवक ला मार डरिस। युवक हा अपन दोस्त के संग लक्ठा के गांव गे रिहिस। वापिस आए के बेरा अचानक सड़क म हाथी गनेस ह हबरगे।
हाथी हा युवक ला पटक-पटक के मार डरिस। ओकर संगवारी ह जइसे-तइसे भाग के अपन जान ला बचाईस। ए हाथी हा धरमजयगढ़ वनमंडल म बीते तीन महीना म 7 लोगन के जान ले डरे हे।
बताए गे हे के लामीखार के इहवइया गुलाब भुइंहर हा मंगलवार के संझा अपन दोस्त कपलेश्वर भुंइहर के बाइक म तीरेच के गांव कौसलपुर गे रिहिस। कौसलपुर ले रात के लगभग 8 बजे लहुंटत रिहिन।
रस्ता म गनेस हाथी हा ठाढ़े मिलगे। अचानक हाथी ला देखके ओमन हड़बड़ागे अउ बाइक ले गिर गें। गुलाब भुंइहर हा बाइक के पाछू म बइठे रिहिस, ओहा भाग गे। लेकिन बाइक चालक कपलेश्वर हा बाइक ला मोड़े के चक्कर म नई भागे पाईस।
ओतके बेर गनेस हाथी हा कपलेश्वर ला पटक के मार डरिस। गुलाब हा जान बचाके भागिस। दूसर दिन ओहा गांव म आके लोगन मन ला जानकारी दिस। ए घटना के बाद रात भर गांववाला मन जागत रिहिन।
गनेस हाथी हा 3 महीना म 7 लोगन ला मारे हे। जेकर ले क्षेत्र म ए हाथी के नाम ले दहसत हे। 23 जुलाई के रेस्क्यू करके पकड़े भी गे रिहिस, लेकिन दूसरेच दिन ही हाथी हा जंजीर ला तोड़के भाग गे।
एकर बाद ले ओ हा वह लगातार औरानारा गांव अउ ओकर आसेपास ही घूमत हे। हाथी के गला म रेडियो कॉलर घलो लगे हे। हाथी के पल-पल के लोकेशन वनमंडल के पास हे। एकर बावजूद विभाग हा गांव वाला मन ला हाथी के हमला ले बचाए नई सकत हे।
