प्रधानमंत्री नरेंद्र मोदी ह वीडियो कॉन्फ्रेंसिंग ले जुड़के स्वामित्व योजना के तहत हितग्राही मन ल बांटिस संपत्ति कार्ड
रायपुर। प्रधानमंत्री नरेंद्र मोदी ह दिल्ली ले वीडियो कॉन्फ्रेंसिंग के माध्यम ले जुड़के के छत्तीसगढ़ के लाभार्थी मन ल स्वामित्व योजना के तहत संपत्ति कार्ड के वितरण करिन अउ संवाद घलो करिन। कार्यक्रम म सूरजपुर जिला के 94 ग्राम के 478 लाभार्थी मन ल संपत्ति कार्ड के वितरण करे गिस।
महिला अउ बाल विकास अउ समाज कल्याण मंत्री लक्ष्मी राजवाड़े सूरजपुर जिला के भैयाथान म आयोजित स्वामित्व योजना के सम्पत्ति कार्ड के वितरण कार्यक्रम मुख्य अतिथि के रूप म शामिल होइस।
मंत्री राजवाड़े ह कार्यक्रम ल संबोधित करत कहिन कि स्वामित्व योजना ग्रामीण भारत बर एक परिवर्तनकारी पहल हे। ग्रामीण भारत म आर्थिक प्रगति ल बढ़ावा देय, ए योजना के मुख्य उद्देश्य हे। एखर तहत गांव म बसे क्षेत्र म घर के मालिक मन ल ‘स्वामित्व अधिकार’ प्रदान करे जात हे। ए योजना के तहत सर्वेक्षण बर नवीनतम ड्रोन तकनीक के उपयोग करे जात हे। ए योजना संपत्ती के मुद्रीकरण, बैंक ले कर्ज लेय म सहूलियत, संपत्ति ले जुड़े विवाद ल कम करे के, ग्रामीण क्षेत्र म संपत्ति अउ संपत्ति कर के बेहतर आकलन करे अउ गांव स्तर के समग्र योजना बनाए म मदद करथे। ओमन ह लाभार्थी कार्ड धारक ल बधाई दिन।
मंत्री राजवाड़े ह कार्यक्रम म 11 करोड़ 09 लाख के लागत ले विभिन्न विकास कार्य के भूमि पूजन अउ लोकार्पण करिन। ओमन ह एक दिव्यांगजन विवाहित जोड़ा ल निःशक्त विवाह प्रोत्साहन योजना अंतर्गत 1 लाख रुपया के चेक के वितरण करिन। ओमन ह उपस्थित जन ले बाल विवाह निषेध, स्वच्छता अभियान व नशामुक्ति अभियान अंतर्गत शपथ घलो दिलायिन।
