आक्रोसित ग्रामीन मन ह जोन कार्यालय ल घेरिस

रायपुर। राजधानी के भाठागांव चउक ले बाजार अउ निगम के जोन दफ्तर ल हटाए बर गुरूवार के धरना प्रदर्सन करे गिस। आक्रोसित ग्रामीन मन ह जोन कार्यालय ल घेर लिन।  ग्रामीन काफी देर तक सड़क म घलो बइठे रहिन हे, जेखर सेती चक्काजाम के स्थिति हन गिस।

भाठागांव के निवासी मन के कहिना हे के, इहां बाजार के आघू ही निगम ह नवां जोन दफ्तर बनावत हे। बड़े बिल्डिंग बने ले बाजार घिर जाही। अभु घलोक बाजार के क्षेत्रफल अब्बड़  छोटे हवय।  जेखर सेती सब्जी बेचइया मन सड़क के तीर म बइठ के धंधा करत हे। सड़क म बाजार लगे ले इहां हमेसा सड़क जाम हो जाथे। जेखर ले आवइया-जावइया मन ल काफी परेसानी होवत हे।

ग्रामीन मन कहिन के, बाजार स्थल अउ जोन दफ्तर दूनों के जगह बदले जाना चाही। ए स्थान म पहिली राजस्व विभाग के जर्जर भवन रहिस हे। जेला तोड़के नवां जोन कार्यालय बनाय जात हे। ए बिल्डिंग के ग्रामीन  मन काफी दिन ले विरोध करत हे।  ग्रामीन मन के संग क्षेत्र के जनप्रतिनिधि घलो एखर विरोध करत हुए कमीश्नर ल  पहिली घलो सिकायत करे रहिन हे। जेखर बाद काम ल रोक देय गिस।

 आज फेर ले काम सुरू कर देय गिस। जेला देख के ग्रामीन मन गुस्सा गे अउ देखत- देखत काफी संख्या म ग्रामीन अउ बाजार के व्यपारी इहां जमा हो गिन।  सैकड़ों के संख्या म ग्रामीन मन ह  युवा नेता ब्रम्हानंद सोनकर के नेतृत्व म जोन कार्यालय के घेराव करे बर पहुंचगे।

भीड़ दफ्तर के बाहर प्रदरसनन करत हुए जमके नारेबाजी करिन।  ए बीच म जनप्रतिनिधि कमीश्नर विनय मिश्रा ले मिले बर पहुंचिन अउ अपन बात रखिन। कमीश्नर ह ग्रामीन मन ल आश्वासन देय हे के सबो  मिलके ए समस्या के हल निकालही। ओखर बाद ग्रामीन सांत होइस।